40 വർഷത്തിലേറെയായി സിനിമാ ലോകത്ത് തിളങ്ങി നിൽക്കുന്ന നടിയാണ് ഉർവശി. തെന്നിന്ത്യയൊട്ടാകെ ഒട്ടേറെ ആരാധകരുമുണ്ട് ഉർവശിക്ക്. സിനിമയിലെ ഓരോ മാറ്റങ്ങളും കണ്ടു വളർന്ന നടി കൂടിയാണ് ഉർവശി. മാത്രവുമല്ല, ഇതിനോടകം ഒട്ടേറെ അവാർഡുകളും നടിയെ തേടിയെത്തി.

സൂപ്പർ ഹിറ്റ് ചിത്രം കിലുക്കത്തിൽ രേവതി അവതരിപ്പിച്ച കഥാപാത്രത്തിനായി ആദ്യം കാസ്റ്റ് ചെയ്തത് ഉർവശിയെ ആയിരുന്നു. പ്രിയദർശൻ- മോഹൻലാൽ കൂട്ടുകെട്ടിന്റെ ചിത്രത്തിലും ആദ്യം സമീപിച്ചത് ഉർവശിയെ ആയിരുന്നു. കഥാപാത്രങ്ങളൊരുപാട് നമ്മളെ തേടിയെത്തുമെന്നും എല്ലാം ചിലപ്പോൾ ചെയ്യാൻ കഴിഞ്ഞെന്ന് വരില്ലെന്ന് പറയുകയാണ് ഉർവശിയിപ്പോൾ.

"സിനിമാ ലോകത്ത് ഇത് പുതുമയുള്ള കാര്യമൊന്നുമല്ല. കഥാപാത്രങ്ങൾ ഒരുപാട് നമ്മളെ തേടിയെത്തും. പക്ഷേ എല്ലാം നമ്മളെക്കൊണ്ട് ചെയ്യാൻ പറ്റണമെന്നില്ല. ചിലപ്പോൾ സമയം ഉണ്ടാകണമെന്നില്ല, ചിലപ്പോൾ കഥ നമുക്ക് ഇഷ്ടമാകണമെന്നില്ല. അങ്ങനെ പല കാരണങ്ങൾ ഉണ്ടല്ലോ. പിന്നെ അന്നൊക്കെ സിനിമയ്ക്ക് പുറകെ സിനിമ അങ്ങനെയാണല്ലോ.

നമുക്ക് തീരെ സമയം കിട്ടില്ല. ചിത്രം ഒക്കെ എനിക്ക് നഷ്ടമായ സിനിമയാണ്. പിന്നെ ഉള്ളൊഴുക്ക് പോലെയുള്ള ചില സിനിമകളിൽ ഈ കഥാപാത്രം നമ്മൾ തന്നെ ചെയ്യണമെന്ന് വാശി പിടിക്കുന്ന സംവിധായകരും ഉണ്ട്". - ഉർവശി പറഞ്ഞു. ലീഡ് റോളുകൾ മാത്രമേ ചെയ്യൂ എന്ന് പറഞ്ഞ് വാശി പിടിക്കുന്ന ഒരു നടിയല്ല താനെന്നും ഉർവശി കൂട്ടിച്ചേർത്തു.

തേടിയെത്തുന്ന സിനിമകളാണ് ചെയ്യാറ്, അതറിയാതെ തന്നെ ടൈറ്റിൽ റോളുകൾ ആയി പോകുന്നതാണെന്നും ഉർവശി കൂട്ടിച്ചേർത്തു. ഡബ്ബിങ്ങിനെക്കുറിച്ചും ഉർവശി സംസാരിച്ചു. മുൻകാല സിനിമകളിൽ അഭിനയിക്കുമ്പോൾ തനിക്ക് നേർത്ത ശബ്ദമായിരുന്നുവെന്നും അതിന്റെ കൂടെ കൊഞ്ചലും കൂടിയായപ്പോൾ, സിനിമാറ്റിക് വോയ്സും ​ഗൗരവമുള്ള ശബ്ദവും ചെയ്യാൻ പറ്റാത്തതു കൊണ്ടാണ് അതിന് ശ്രമിക്കാതിരുന്നതെന്നും ഉർവശി പറഞ്ഞു.

ഇപ്പോൾ താൻ തന്നെയാണ് ഡബ്ബ് ചെയ്യാറുള്ളതെന്നും ഉർവശി പറഞ്ഞു. ഓൺലൈൻ മീഡിയ വന്നപ്പോൾ കൂടുതലും ആളുകൾ ശബ്ദം തിരിച്ചറിയാൻ തുടങ്ങിയെന്നും അതുകൊണ്ട് നമ്മൾ തന്നെ ഡബ്ബ് ചെയ്യുന്നതാണ് നല്ലതെന്നും ഉർവശി വ്യക്തമാക്കി. 1988 ലാണ് ചിത്രം പുറത്തിറങ്ങുന്നത്. മോഹൻലാലിനൊപ്പം രഞ്ജിനി, ലിസി, നെടുമുടി വേണു, ശ്രീനിവാസൻ എന്നിവരും ചിത്രത്തിൽ പ്രധാന വേഷങ്ങളിലെത്തിയിരുന്നു.