അഭിനയത്തിന് പുറമെ നൃത്തത്തിലും സംഗീതത്തിലുമെല്ലാം മികവ് തെളിയിച്ച കലാകാരിയാണ് വീണ നായര്‍. ഏറെ നാളുകളായി നൃത്ത വേദിയില്‍ നിന്നും വിട്ടുനില്‍ക്കുകയായിരുന്ന വീണ നായര്‍ ഈയ്യടുത്താണ് തിരിച്ചുവരവ് നടത്തിയത്. ശിവരാത്രിയോട് അനുബന്ധിച്ച് നടത്തിയ പരിപാടിയിലാണ് പതിമൂന്ന് വര്‍ഷത്തിന് ശേഷം വീണ ചിലങ്കയണിഞ്ഞതും ഭാരതനാട്യം അവതരിപ്പിച്ചതും.

വീണയുടെ നൃത്തിന് കയ്യടികള്‍ മാത്രമല്ല പക്ഷെ ലഭിച്ചത്. സോഷ്യല്‍ മീഡിയയില്‍ നിന്നും കടുത്ത സൈബര്‍ ആക്രമണവും വീണയ്ക്ക് നേരിടേണ്ടി വന്നു. താരത്തിന്റെ വണ്ണമായിരുന്നു സൈബര്‍ ലോകത്തിന് ഇഷ്ടപ്പെടാതെ പോയത്. രൂഷമായ ഭാഷയിലായിരുന്നു സോഷ്യല്‍ മീഡിയ വീണയെ അധിക്ഷേപിച്ചത്. ഇപ്പോഴിതാ തനിക്ക് നേരിടേണ്ടി ബോഡി ഷെയ്മിങിനോട് വീണ പ്രതികരിച്ചിരിക്കുകയാണ്.

തന്റെ പുതിയ സിനിമയുടെ പ്രൊമോഷന്റെ ഭാഗമായുള്ള അഭിമുഖത്തിലാണ് വീണ ബോഡി ഷെയ്മിങിനോട് പ്രതികരിച്ചത്. താന്‍ എന്തിനാണ് വണ്ണം കുറയ്ക്കുന്നതെന്നാണ് വീണ ചോദിക്കുന്നത്. തന്റെ ശരീരത്തില്‍ താന്‍ സന്തോഷവതിയാണെന്നും വീണ പറയുന്നു.

''എന്തിനാണ് വണ്ണം കുറയ്ക്കുന്നത്? എന്റെ ശരീരത്തില്‍ ഞാന്‍ സന്തോഷിക്കുന്നു. ദൈവം അനുഗ്രഹിച്ച് എനിക്ക് അസുഖങ്ങളൊന്നുമില്ല. ചെറുതിലെ ഞാന്‍ നന്നായി തടിച്ചിട്ടാണ്. ഞാന്‍ നന്നായി ഭക്ഷണം കഴിക്കുന്നയാളാണ്. സത്യസന്ധമായി പറയുകയാണ് വണ്ണമുണ്ടെന്ന് എല്ലാവരും പറയുമ്പോഴും എന്നെ എനിക്ക് ഭയങ്കര ഇഷ്ടമാണ്. എന്റെ വണ്ണത്തിലും രൂപത്തിലും ശരീരത്തിലും ഞാന്‍ ഭയങ്കരമായി സന്തോഷിക്കുന്നു.'' എന്നായിരുന്നു വീണയുടെ പ്രതികരണം.