വിജയ്‌യുടെ രാഷ്ട്രീയ പ്രവേശനത്തിന്റെ സൂചനകള്‍ നല്‍കിയ ചിത്രമായിരുന്നു ആര്‍എല്‍ വിജയ് ഒരുക്കിയ തലൈവ. ടൈം ടു ലീഡ് എന്ന ടാഗ് ലൈനോടെയെത്തിയ ചിത്രമാണ് വിജയ് എന്ന നടനില്‍ നിന്നും വിജയ് എന്ന രാഷ്ട്രീയക്കാരനിലേക്കുള്ള ചുവടുവെപ്പിന് തുടക്കം കുറിച്ചത്. എന്നാല്‍ തന്റെ സിനിമ രാഷ്ട്രീയം പറയുന്ന ചിത്രമായിരുന്നില്ലെന്നാണ് സംവിധായകന്‍ പറയുന്നത്.

തന്റേത് രാഷ്ട്രീയ സിനിമ ആയിരുന്നില്ല. എന്തുകൊണ്ടാണ് തന്റെ സിനിമയ്ക്ക് അങ്ങനൊരു മാനം നല്‍കപ്പെട്ടതെന്ന് അറിയില്ലെന്നും സംവിധായകന്‍ പറയുന്നു. സിനിമ വികടന് നല്‍കിയ അഭിമുഖത്തിലാണ് അദ്ദേഹത്തിന്റെ പ്രതികരണം.

''അതൊരു പൊളിറ്റിക്കല്‍ സിനിമയായിരുന്നില്ല. അതാണ് ഞങ്ങളെ അത്ഭുതപ്പെടുത്തിയത്. സത്യരാജിന്റെ കഥാപാത്രം ഭരിച്ചിരുന്ന നാടിന്റെ കഥയായിരുന്നു. അദ്ദേഹത്തിന് ശേഷം വിജയ് ആ സ്ഥാനം ഏറ്റെടുക്കുകയും ജനങ്ങളുടെ നേതാവാവുകയും ചെയ്യുന്നു. അതൊരു രാഷ്ട്രീയ സിനിമയായിരുന്നില്ല. എങ്ങനെയാണ് പൊളിറ്റിക്കല്‍ സിനിമയായി വ്യാഖ്യാനിക്കപ്പെട്ടതെന്ന് അറിയില്ല. പക്ഷെ വിജയ് സാറിനൊപ്പം നല്ലൊരു യാത്ര തന്നെയായിരുന്നു'' എന്നാണ് സംവിധായകന്‍ പറയുന്നത്.

തലൈവ എന്നത് മാത്രമായിരുന്നു തന്റെ മനസിലുണ്ടായിരുന്ന പേര്. ടൈം ടു ലീഡ് എന്ന ടാഗ് ലൈന്‍ നിര്‍ദ്ദേശിച്ചത് നിര്‍മാതാവാണെന്നും അദ്ദേഹം പറയുന്നു. പേര് ചേരുന്നത് ആയതിനാലാണ് അത് സ്വീകരിച്ചതെന്നും അദ്ദേഹം പറയുന്നു. അതേസമയം ടൈം ടു ലീഡ് എന്ന ടാഗ് ലൈന്‍ അന്ന് വലിയ ചര്‍ച്ചകള്‍ക്ക് ഇടവരുത്തി. ജയലളിതയുടെ സര്‍ക്കാരിനെ ചൊടിപ്പിച്ചു. വിജയിയെ അടുത്ത എംജിആറെന്നും പുതിയ നേതാവെന്നും ചിത്രീകരിക്കുകയുമുണ്ടായി. ഇത് സിനിമയുടെ റിലീസ് വൈകുന്നതിലേക്ക് വരെ എത്തിക്കുകയുണ്ടായി.

അമല പോള്‍ ആയിരുന്നു ചിത്രത്തിലെ നായിക. സത്യരാജ്, സന്താനം, അഭിമന്യു സിങ്, നാസര്‍, രാജീവ് പിള്ള തുടങ്ങിയവരും ചിത്രത്തില്‍ അഭിനയിച്ചിരുന്നു.