തന്റെ ജീവിതത്തിൽ കിട്ടിയ വലിയ ഭാ​ഗ്യമാണ് 'മണിച്ചിത്രത്താഴ്' സിനിമ എന്ന് നടി വിനയ പ്രസാദ്. ഒരിക്കലും അതിന്റെ രണ്ടാം ഭാ​ഗത്തെക്കുറിച്ച് താൻ ആലോചിച്ചിട്ടില്ലെന്നും വിനയ പറഞ്ഞു. തന്റെ പുതിയ ചിത്രമായ 'മധുരമീ ജീവിത'ത്തിന്റെ പ്രൊമോഷന്റെ ഭാ​ഗമായി സ്കൈലാർക്ക് പിക്ചേഴ്സ് എന്റർ‌ടെയ്ൻമെന്റിന് നൽകിയ അഭിമുഖത്തിൽ സംസാരിക്കുകയായിരുന്നു നടി.

"മണിച്ചിത്രത്താഴ് 2' വിനെക്കുറിച്ച് ഞാൻ ആലോചിച്ചിട്ടില്ല. പക്ഷേ പലരും രണ്ടാം ഭാ​ഗത്തേക്കുറിച്ച് പല കഥകളും പറഞ്ഞ് ഞാൻ കേട്ടിട്ടുണ്ട്. ഇങ്ങനെയായിരിക്കാം, അങ്ങനെയായിരിക്കാം.. അങ്ങനെ പല ഭാവനകളും കേട്ടിട്ടുണ്ട്. കൊച്ചു കുട്ടികൾ പോലും ഇമാജിൻ ചെയ്യുന്നുണ്ട്.

ഇപ്പോൾ റിയാലിറ്റി ഷോകളിൽ പോലും പല തരത്തിലുള്ള ഇംപ്രവൈസേഷനാണ് രണ്ടാം ഭാ​ഗത്തെക്കുറിച്ച് വന്നിരിക്കുന്നത്. സ്കിറ്റ് ഉണ്ട്, സ്പൂഫ് ഉണ്ട്, റീൽസ് ഉണ്ട്... അങ്ങനെ എന്തൊക്കെയാണുള്ളത്. അതൊരു ഭാ​ഗ്യമല്ലേ. അതുപോലെയൊരു പടത്തിൽ അവസരം കിട്ടിയത് ഭയങ്കര വലിയ ഭാ​ഗ്യമാണ്". - വിനയ പ്രസാദ് പറഞ്ഞു.

1993 ൽ ഫാസിൽ സംവിധാനം ചെയ്ത 'മണിച്ചിത്രത്താഴി'ൽ ശ്രീദേവി എന്ന കഥാപാത്രമായാണ് വിനയ പ്രസാദ് എത്തിയത്. മോഹൻലാൽ, സുരേഷ് ഗോപി, ശോഭന എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.

ഫാമിലി ഡ്രാമയായെത്തുന്ന മധുരമീ ജീവിതത്തിൽ സിദ്ദിഖ്, ​ഗായത്രി സുരേഷ്, പൂജിത മേനോൻ എന്നിവരും പ്രധാന കഥാപാത്രങ്ങളായെത്തുന്നുണ്ട്. ഓ​ഗസ്റ്റ് 14 നാണ് ചിത്രം തിയറ്ററുകളിലെത്തുന്നത്.