തെന്നിന്ത്യയുടെ റോക്കി ഭായ് ആണ് യഷ്. ഇന്ന് താരത്തിന്റെ 39-ാം പിറന്നാൾ ആണ്. ​ഗീതു മോഹൻദാസ് സംവിധാനം ചെയ്യുന്ന ടോക്സിക് ആണ് യഷിന്റെ ഏറ്റവും പുതിയ ചിത്രം. താരത്തിന്റെ പിറന്നാൾ ദിനത്തിൽ ലോകമെമ്പാടുമുള്ള റോക്കി ഭായ് ആരാധകർക്കായി ടോക്സിക് ബർത്ത്ഡേ പീക്ക് വിഡിയോ പുറത്തുവന്നിരിക്കുകയാണ്. വിഡിയോ പുറത്തുവന്ന് നിമിഷ നേരം കൊണ്ട് തന്നെ സോഷ്യൽ മീഡിയയിൽ കത്തിപടരുകയാണ്.

യഷിന്റെ സ്വാ​ഗ് തന്നെയാണ് വിഡിയോയുടെ ഏറ്റവും വലിയ ഹൈലൈറ്റ്. ഒരു മിനിറ്റ് ദൈർഘ്യമുള്ള വിഡിയോയിൽ, വെളുത്ത വസ്ത്രം ധരിച്ച് തലയിൽ തൊപ്പി വച്ച് ഒരു കസിനോയിലേക്ക് പ്രവേശിക്കുന്ന യഷിനെയാണ് കാണാനാവുക. സ്റ്റൈലിഷ് മാസ് എൻട്രി തന്നെയാണ് താരത്തിന്റേതെന്ന് പറയാതെ വയ്യ. വിഡിയോയിലെ ബാക്ക്​ഗ്രൗണ്ട് സ്കോറും ത്രസിപ്പിക്കുന്നതാണ്. ഓരോ ഫ്രെയിമിലും സസ്പെൻസ് ഒരുക്കിയാണ് വിഡിയോ പുറത്തുവിട്ടിരിക്കുന്നത്.

യഷിന്റെ മറ്റൊരു മാസ് കഥാപാത്രം തന്നെ സിനിമയിൽ പ്രതീക്ഷിക്കാം എന്ന് ഉറപ്പ് നൽകുന്നതാണ് വിഡിയോ. റോക്കി ഭായ്ക്കും മുകളിലാകുമോ ടോക്സിക്കിലെ കഥാപാത്രം എന്നാണ് ആരാധകർ ഉറ്റു നോക്കുന്നത്. ഹാപ്പി ബർത്ത് ഡേ റോക്കിങ് സ്റ്റാർ എന്നും വിഡിയോയുടെ അവസാനം യഷിന് ആശംസ നേർന്ന് കൊടുത്തിട്ടുണ്ട്. 'മൂത്തോൻ' എന്ന ചിത്രത്തിന് ശേഷം ഗീതു മോഹൻദാസ് സംവിധാനം ചെയ്യുന്ന ചിത്രമാണ് ടോക്സിക്- എ ഫെയറി ടെയിൽ ഫോർ ഗ്രോൺ-അപ്സ്.

കെജിഎഫ് ഫ്രാഞ്ചൈസിക്ക് ശേഷം യഷിന്റേതായി പുറത്തിറങ്ങുന്ന സിനിമ എന്നതിനാൽ തന്നെ സിനിമയുടെ മേൽ വലിയ ഹൈപ്പാണുള്ളത്. ഗീതു മോഹൻദാസ് എന്ന സംവിധായികയുടെ പേരും ഒപ്പം ചേരുന്നതിനാൽ മലയാള സിനിമാ പ്രേമികൾക്ക് ഈ ചിത്രത്തിൽ ഇരട്ടി പ്രതീക്ഷയുമുണ്ട്. ഹോളിവുഡിലെ പ്രശസ്ത ആക്ഷൻ ഡയറക്ടർ ജെ ജെ പെറി ടോക്‌സിക്കിൽ ജോയിൻ ചെയ്തതും വാർത്തകളിൽ ഇടം നേടിയിരുന്നു.

'ഇതെന്നെ മാനസികമായി തകർത്തു, അനുഭവിച്ചാലേ നിങ്ങൾക്ക് ‌എന്റെ വേദന മനസിലാവൂ'; ഉദിത് നാരായൺ

കെ വി എൻ പ്രൊഡക്ഷൻസിന്റെ ബാനറിൽ വെങ്കട്ട് കെ നാരായണയും മോൺസ്റ്റർ മൈൻഡ് ക്രിയേഷൻസും ചേർന്നാണ് ടോക്സിക് നിർമിക്കുന്നത്. യഷിന്റെ കരിയറിലെ 19-ാമാത്തെ സിനിമയാണിത്. നയൻതാര, കിയാര അദ്വാനി, താര സുതാരിയ, ഹുമ ഖുറേഷി എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ടെന്നാണ് വിവരം. എന്നാൽ ചിത്രത്തിലെ മറ്റ് താരങ്ങളെക്കുറിച്ച് ഇതുവരെ ഔദ്യോ​ഗിക സ്ഥിരീകരണമൊന്നും വന്നിട്ടില്ല.