ചെന്നൈ: പ്രസിദ്ധ ഗായകന്‍ എസ് പി ബാലസുബ്രഹ്മണ്യത്തിന്റെ കോവിഡ് പരിശോധനാഫലം നെഗറ്റീവ് ആണെന്ന തരത്തില്‍ പ്രചരിക്കുന്നത് ഊഹാപോഹങ്ങളാണെന്ന് മകന്‍ ചരണും ആശുപത്രി അധികൃതരും. എസ്പിബിയുടെ ആരോഗ്യനിലയില്‍ മാറ്റമില്ലെന്ന് ചരണ്‍ സാമൂഹ്യ മാധ്യമങ്ങളിലൂടെ വ്യക്തമാക്കി. 

അദ്ദേഹത്തിന്റെ കോവിഡ് പരിശോധനാഫലത്തെ കുറിച്ച് ആശുപത്രി അധികൃതര്‍ പുറത്തിറക്കിയ മെഡിക്കല്‍ ബുള്ളറ്റിനിലും പരാമര്‍ശമില്ല.
അദ്ദേഹത്തിന്റെ ആരോഗ്യനില തൃപ്തികരമാണെന്നും എന്നാല്‍ വെന്റിലേറ്ററില്‍ തന്നെയാണെന്നും ചെന്നൈ എം ജി എം ഹെല്‍ത്ത് കെയര്‍ അധികൃതര്‍ വ്യക്തമാക്കി. ചികിത്സയ്ക്കായി അമേരിക്കയിലും യുകെയിലുമുള്ള ആരോഗ്യവിദഗ്ധരുടെ സേവനവും ലഭ്യമാക്കിയിട്ടുണ്ടെന്നും  ആശുപത്രി അധികൃതര്‍ വ്യക്തമാക്കി. 

എസ് പി ബിയുടെ കോവിഡ് പരിശോധനാഫലം നെഗറ്റീവ് ആണെന്ന് രാവിലെ വാര്‍ത്തകള്‍ പുറത്തുവന്നിരുന്നു. മകന്‍ ചരണ്‍ അറിയിച്ചു എന്ന തരത്തിലാണ് വാര്‍ത്തകള്‍ പുറത്തുവന്നത്. 

ഓഗസ്റ്റ് അഞ്ചിനാണ് അദ്ദേഹത്തിന് രോഗം സ്ഥിരീകരിച്ചത്. അദ്ദേഹം തന്നെയാണ് ഇത് അറിയിച്ചതും. എന്നാല്‍ പെട്ടെന്ന് തന്നെ അദ്ദേഹത്തിന്റെ ആരോഗ്യസ്ഥിതി മോശമാവുകയായിരുന്നു. ഇതേത്തുടര്‍ന്ന് ചെന്നൈയിലെ എം ജി എം ഹെല്‍ത്ത് കെയര്‍ ആശുപത്രിയില്‍ പ്രവേശിപ്പിക്കുകയായിരുന്നു.