ഇതിഹാസമായ മഹാഭാരതം സിനിമയാക്കാനുള്ള ആലോചനയിലാണ് ആമിര്‍ ഖാന്‍ എന്ന് വാര്‍ത്തകള്‍ പുറത്തുവന്നിരുന്നു. ബ്രഹ്മാണ്ഡ ചിത്രമായ ബാഹുബലിക്ക് വേണ്ടി തിരക്കഥ ഒരുക്കിയ കെ വി വിജയേന്ദ്രപ്രസാദും ചിത്രത്തിന്റെ ഭാഗമാകുന്നു എന്ന വിവരമാണ് പുതുതായി പുറത്തുവരുന്നത്. ചിത്രത്തന് വേണ്ടി തിരക്കഥയൊരുക്കുന്നതിനായി ആമിറും താനും തമ്മില്‍ ചര്‍ച്ച നടത്തിയെന്ന് വിജയേന്ദ്ര പ്രസാദ്് തന്നെയാണ് വ്യക്തമാക്കിയിരിക്കുന്നത്. 

ബജ്രംഗി ഭായിജാന്‍, മണികര്‍ണിക തുടങ്ങിയ ഹിറ്റ് ഹിന്ദി ചിത്രങ്ങള്‍ക്ക് വേണ്ടി വിജയേന്ദ്ര പ്രസാദ് തിരക്കഥയെഴുതിയിട്ടുണ്ട്. മഹാഭാരത്തെക്കുറിച്ച് ആമിറുമായി ചര്‍ച്ചകള്‍ നടന്നെന്നും എന്നാല്‍ പ്രോജക്ടിനെപ്പറ്റി ഇപ്പോള്‍ കൂടുതല്‍ ഒന്നും വെളിപ്പെടുത്താന്‍ സാധിക്കില്ലെന്നുമാണ് വിജയേന്ദ്ര പ്രസാദ് പറഞ്ഞിരിക്കുന്നത്. 

ലോക്ക്ഡൗണ്‍ കാലത്ത് ചില കഥകള്‍ പ്ലാന്‍ ചെയ്തിട്ടുണ്ടെന്നും അദ്ദേഹം വ്യക്തമാക്കി. മകന്‍ എസ് എസ് രാജമൗലി സംവിധാനം ചെയ്യുന്ന 'ആര്‍ ആര്‍ ആര്‍' ആണ് വിജയേന്ദ്ര പ്രസാദിന്റെ പുതിയ ചിത്രം. 

രാം ചരണ്‍ തേജ, ജൂനിയര്‍ എന്‍ടിആര്‍, അജയ് ദേവ്ഗണ്‍ എന്നിവരാണ് ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നത്. തെലുങ്ക്, തമിഴ്, മലയാളം, ഹിന്ദി ഭാഷകളില്‍ അടുത്ത വര്‍ഷമാണ് ചിത്രം റിലീസ് ചെയ്യുക.