നിരവധി ആരാധകരുള്ള തെന്നിന്ത്യന്‍ താരമാണ് റാണാ ദഗ്ഗുപതി. ബാഹുബലി എന്ന ബ്രഹ്മാണ്ഡ ചിത്രത്തിലൂടെ മലയാളത്തിലെ പ്രേക്ഷകരുടെ പ്രീതിയും താരം പിടിച്ചുപറ്റിയിട്ടുണ്ട്. എന്നാലിപ്പോള്‍ തന്റെ പുതിയ ചിത്രം കാണരുതെന്ന് പറഞ്ഞ് രംഗത്തെത്തിയിരിക്കുകയാണ് താരം. 

റാണയുടെ പുതിയ ചിത്രമെന്ന പേരില്‍ 1945 എന്ന സിനിമയുടെ ഫസ്റ്റ്‌ലുക്ക് പോസ്റ്റര്‍ സംവിധായകന്‍ പുറത്തിറക്കിയിരുന്നു. അതിന് പിന്നാലെയാണ് റാണയുടെ വിചിത്രമായ ട്വീറ്റ്. ഒരു വര്‍ഷമായി ചിത്രത്തെക്കുറിച്ച് യാതൊരു അറിവും ഇല്ലായിരുന്നുവെന്നും ഇതൊരു അപൂര്‍ണ്ണ ചിത്രമാണെന്നും റാണ ട്വീറ്റില്‍ പറയുന്നു. 

രണ്ട് വര്‍ഷം മുന്‍പായിരുന്നു ഈ ചിത്രം അനൗണ്‍സ് ചെയ്തത്. 1945ല്‍ നേതാജി സുഭാഷ് ചന്ദ്രബോസിന്റെ ഐഎന്‍എയില്‍ പ്രവര്‍ത്തിച്ച ഒരു സൈനികന്റെ വേഷമാണ് റാണ അവതരിപ്പിക്കുന്നതെന്ന് അന്ന് പറഞ്ഞിരുന്നു. എന്നാല്‍ തന്റെ പ്രതിഫലം പോലും പൂര്‍ണ്ണമായും തന്നിട്ടില്ലെന്നും ഒരുവര്‍ഷമായി ഈ ചിത്രത്തെക്കുറിച്ചുള്ള യാതൊരു വാര്‍ത്തയും അറിയുന്നില്ലെന്നുമാണ് റാണയുടെ വാദം. തന്റെ പേരില്‍ ജനങ്ങളെ വഞ്ചിക്കുന്ന ഇത്തരം പ്രവര്‍ത്തികള്‍ പ്രോത്സാഹിപ്പിക്കരുതെന്നും റാണ ട്വീറ്റ് ചെയ്തു.