പ്രിയതാരങ്ങളെ നേരില്‍ കാണാനും പരിചയപ്പെടാനും ആഗ്രഹിക്കുന്നവരാകും ബഹുഭൂരിപക്ഷവും. എന്നാല്‍ ചിലരാകട്ടെ അതിനായി എന്തുപണിക്കും തയ്യാറാവുകയും ചെയ്യും.  വളഞ്ഞവഴിയില്‍ ഇതിനു ശ്രമിച്ച യുവാവിന് കിട്ടിയത് എട്ടിന്റെ പണിയും. ഓണ്‍ലൈന്‍ ക്ലാസിഫൈഡ് സൈറ്റായ ലൊക്കാന്റോയുടെ വ്യാജനെ ഉണ്ടാക്കി തമിഴ് നിര്‍മാതാവാണ് യുവാവിനെ പറ്റിച്ചത്. കാജല്‍ അഗര്‍വാളിനെ നേരിട്ട് കണ്ട് പരിചയപ്പെടുത്താന്‍ അവസരം നല്‍കാം എന്നായിരുന്നു വാഗ്ദാനം. യുവാവിന്റെ അച്ഛന്റെ പരാതിയില്‍ രാമനാഥപുരം പൊലീസ് നിര്‍മാതാവിനെ അറസ്റ്റ് ചെയ്തു.

ചെന്നൈ അശോക് നഗറിലെ ലോഡ്ജില്‍ വച്ചാണ് പ്രതി ഗോപാലകൃഷ്ണനെ പൊലീസ് അറസ്റ്റ് ചെയ്തത്. രാമനാഥപുരത്തെ വലിയൊരു ബിസിനനസ്സ്മാന്റെ മകനാണ് ചതിയില്‍പെട്ടത്. താന്‍ വഞ്ചിക്കപ്പെട്ടതറിഞ്ഞ് ആത്മഹത്യയ്ക്കു ശ്രമിച്ചതോടെയാണ് സംഭവം വീട്ടുകാരും അറിയുന്നത്. കാജലിനെ നേരിട്ട് പരിചയപ്പെടുത്താം എന്നുപറഞ്ഞ് യുവാവില്‍ നിന്നും നിര്‍മാതാവ് തട്ടിയെടുത്തത് 75 ലക്ഷം രൂപയാണ്.

തന്റെ മകനെ ദിവസങ്ങളായി കാണാനില്ലെന്ന പരാതിയിലാണ് അച്ഛന്‍ പൊലീസിനെ സമീപിക്കുന്നത്. മറ്റു വിവരങ്ങളൊന്നും ഇല്ലാതിരുന്നതിനാല്‍ കേസ് അന്വേഷിക്കുന്നതിനായി പ്രത്യേക സംഘത്തെ പൊലീസ് നിയമിച്ചിരുന്നു.  ഒരാഴ്ച മുമ്പ് താന്‍ ആത്മഹത്യയ്‌ക്കൊരുങ്ങുകയാണെന്ന് പറഞ്ഞ് അച്ഛനെ യുവാവ് ഫോണ്‍ വിളിച്ചിരുന്നു.

അങ്ങനെ ഫോണ്‍ നമ്പറിലൂടെ യുവാവിന്റെ ലൊക്കേഷന്‍ പൊലീസ് കണ്ടെത്തി. കൊല്‍ക്കത്തയിലേയ്ക്കായിരുന്നു യുവാവ് ഒളിച്ചോടിയത്. അവിടെ എത്തി യുവാവിനെ കണ്ടെത്തിയ പൊലീസ് പിന്നീട് ചോദ്യം ചെയ്തപ്പോളാണ് ഞെട്ടിക്കുന്ന വിവരങ്ങള്‍ പുറത്തുവന്നത്.

നടിമാരെ നേരിട്ട് കാണാന്‍ സാധിക്കുന്ന വെബ്‌സൈറ്റിനെ പറ്റി സുഹൃത്തുക്കള്‍ വഴിയാണ് താന്‍ അറിയുന്നതെന്ന് യുവാവ് പറയുന്നു. അങ്ങനെ ഒരുമാസം മുമ്പ് ഇതുപോലൊരു വെബ്‌സൈറ്റ് സന്ദര്‍ശിക്കാന്‍ ശ്രമിച്ചു. റജിസ്റ്റര്‍ ചെയ്യുന്ന സമയത്താണ് ഫോണിലേയ്ക്ക് ഒരുകോള്‍ വരുന്നത്. 

തന്റെ കൈയ്യില്‍ നടിമാര്‍ ഉണ്ടെന്നും ഇഷ്ടമുള്ള നടിമാരെ തിരഞ്ഞെടുക്കാനായി ഫോട്ടോ അയച്ചുതരാമെന്നും അയാള്‍ പറഞ്ഞു. ഇതിനായി അമ്പതിനായിരം രൂപ ആദ്യം ഓണ്‍ലൈനായി അടക്കണമെന്നും അറിയിച്ചു. അയച്ചുതന്ന ഫോട്ടോകളില്‍ നിന്നും യുവാവ് തിരഞ്ഞെടുത്തത് കാജല്‍ അഗര്‍വാളിന്റെ ചിത്രം. അതിനു ശേഷം തന്റെ േപരും മറ്റു വിവരങ്ങളുമെല്ലാം സൈറ്റിലൂടെ കൈമാറി. പിന്നീട് അയാള്‍ യുവാവിനെ വിളിച്ച് വീണ്ടും 50000 ആവശ്യപ്പെട്ടു. നടിയെ നേരിട്ട് കാണിക്കാം എന്നായിരുന്നു വാഗ്ദാനം.

പക്ഷേ പണം അയച്ചതിനുശേഷം അയാള്‍ അശ്ലീല സൈറ്റുകളുടെ ലിങ്കുകള്‍ മാത്രമാണ് അയച്ചുനല്‍കിയിരുന്നത്. അപ്പോളാണ് ഇത് ചതിയാണെന്ന് യുവാവിനും മനസ്സിലാകുന്നത്. ഇതില്‍ നിന്നും എങ്ങനെയും രക്ഷപ്പെടാന്‍ ശ്രമിക്കുന്നതിനിടെ യുവാവിനെ ഫോണില്‍ വിളിച്ച് ഭീഷണിപ്പെടുത്തുകയായിരുന്നു. 75 ലക്ഷം രൂപ തന്നില്ലെങ്കില്‍ തന്റെ കോള്‍ വിവരങ്ങളും വെബ്‌സൈറ്റ് ലിങ്കും പരസ്യപ്പെടുത്തുമെന്നും വീട്ടുകാരുടെ മുന്നില്‍ നാണംകെടുത്തുമെന്നും അയാള്‍ പറഞ്ഞു.

അങ്ങനെയാണ് 75 ലക്ഷം രൂപ യുവാവ് ഓണ്‍ലൈനായി അയച്ചുകൊടുത്തത്. താന്‍ വഞ്ചിക്കപ്പെട്ടതിന്റെ വിഷമത്തില്‍ യുവാവ് ഒളിച്ചോടുകയും പിന്നീട് ആത്മഹത്യ ചെയ്യാന്‍ തീരുമാനിക്കുകയുമായിരുന്നു.ബാങ്ക് അക്കൗണ്ടിന്റെ വിവരങ്ങള്‍ ശേഖരിച്ച പൊലീസ് അതിന്റെ ഉടമ ഒരു സംവിധായകന്റേതാണെന്ന് തിരിച്ചറിഞ്ഞു. പുതുമുഖ സംവിധായകന്‍ മണികണ്ഠന്റേത് ആയിരുന്നു ആ അക്കൗണ്ട്. എന്നാല്‍ തനിക്ക് ഇതിനെക്കുറിച്ച് ഒന്നും അറിയില്ലെന്നും അക്കൗണ്ട് കൈകാര്യം ചെയ്യുന്നത് നിര്‍മാതാവ് ശരവണ കുമാര്‍ ആണെന്നും അയാള്‍ പൊലീസിന് മൊഴി നല്‍കി. അങ്ങനെയാണ് ശരവണകുമാര്‍ എന്നറിയപ്പെടുന്ന ഗോപാലകൃഷ്ണനെ പൊലീസ് പിടികൂടുന്നത്. പ്രതിയില്‍ നിന്നും 10 ലക്ഷം രൂപയും മൊബൈല്‍ ഫോണും പിടിച്ചെടുത്തിട്ടുണ്ട്.