ചെന്നൈ : കാഞ്ചി കാമകോടി പീഠത്തിലെ മഠാധിപതി സ്വാമി ജയേന്ദ്രസരസ്വതിയുടെ നിര്യാണത്തില്‍ അനുശോചിച്ച് സൂപ്പര്‍ സ്റ്റാര്‍ രജനീകാന്തിന്റെ പുതിയ ചിത്രം കാല കരികാലന്റെ ടീസര്‍ റിലീസ് മാറ്റിവെച്ചു. ചിത്രത്തിന്റെ നിര്‍മ്മാതാവും രജനിയുടെ മകളുടെ ഭര്‍ത്താവുമായ ധനുഷാണ് ട്വിറ്ററിലൂടെ ഇക്കാര്യം അറിയിച്ചത്. ചിത്രത്തിന്റെ ടീസര്‍ മാര്‍ച്ച് രണ്ടിന് പുറത്തിറക്കും. ചിത്രത്തിന്റെ ടീസറിനായി ആകാംക്ഷയോടെ കാത്തിരിക്കുന്ന ആരാധകരോട് മാപ്പു ചോദിക്കുന്നതായും ധനുഷ് ട്വീറ്റില്‍ കുറിച്ചു. 

രജനിയുടെ സൂപ്പര്‍ ചിത്രമായ കബാലിയുടെ മാതൃക പിന്തുടര്‍ന്ന് ഒരുക്കുന്ന ചിത്രമാണ് കാല കരികാലന്‍. കബാലി സംവിധായകന്‍ പാ രഞ്ജിത്ത് തന്നെയാണ് ഗ്യാംഗ്സ്റ്റര്‍ കഥ പറയുന്ന കാലയുടെയും സംവിധായകന്‍. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ രജനിയുടെ ജന്മദിനത്തില്‍ ധനുഷ് പുറത്തുവിട്ടിരുന്നു. 

രജനിയുടെ 164-ാമത്തെ ചിത്രമാണ് കാല കരികാലന്‍. ബോളിവുഡ് താരങ്ങളായ നാന പടേക്കര്‍, ഹുമ ഖുറേഷി, അഞ്ജലി പാട്ടീല്‍, സമുദ്രക്കനി തുടങ്ങിയ താരനിര ചിത്രത്തില്‍ വേഷമിടുന്നു.