തമിഴ്‌നാട് മുന്‍ മുഖ്യമന്ത്രി ജയലളിതയുടെ ജീവിതം വീണ്ടും സിനിമയാകുന്നു. പ്രമുഖ സംവിധായകന്‍ ഗൗതം വാസുദേവ് മേനോനും പ്രശാന്ത് മുരുകനും ചേര്‍ന്ന് ഒരുക്കുന്ന വെബ്‌സീരീസിന് ക്വീന്‍ എന്നാണ് പേരിട്ടിരിക്കുന്നത്. നടി രമ്യാ കൃഷ്ണനാണ് ജയലളിതയുടെ വേഷത്തില്‍ എത്തുന്നത്. ക്വീനിന്റെ ഫസ്റ്റ് ലുക്ക് പോസ്റ്റര്‍ പുറത്തുവിട്ടു. മലയാളി താരം ഇന്ദ്രജിത്തും ചിത്രത്തില്‍ വേഷമിടുന്നുണ്ട്. ഇന്ദ്രജിത്തിന്റെ ആദ്യത്തെ വെബ് സീരിസാണ് ഇത്.

ജയലളിതയുടെ ബാല്യം, കൗമാരകാലം സംവിധാനം ചെയ്യുന്നത് പ്രശാന്ത് മുരുകനാണ്. സിനിമരാഷ്ട്രീയ കാലഘട്ടങ്ങളാണ് ഗൗതം മേനോന്‍ ഒരുക്കുന്നത്. അനിഘ സുരേന്ദ്രനാണ് ജയലളിതയുടെ ബാല്യകാലം അവതരിപ്പിക്കുന്നത്. ധനുഷിനെ നായകനാക്കി ഒരുക്കിയ എന്നൈ നോക്കി പായും തോട്ട എന്ന സിനിമയുടെ റിലീസിന് ശേഷം ഗൗതം മേനോന്‍ വെബ് സീരിസിന്റെ തിരക്കുകളിലേക്ക് പ്രവേശിക്കും. 

ധനുഷ്, മേഘ്‌ന ആകാശ് എന്നിവര്‍ പ്രധാന വേഷത്തിലെത്തുന്ന എന്നൈ നോക്കി പായും തോട്ട സെപ്തബര്‍ 12 അല്ലെങ്കില്‍ 13 ന് പുറത്തിറങ്ങുമെന്നാണ് ഇപ്പോള്‍ വരുന്ന റിപ്പോര്‍ട്ടുകള്‍. ഇതിനോടകം നിരവധി പേരാണ് ജയലളിതയുടെ ജീവിതം സിനിമയാക്കാന്‍ മുന്നോട്ടുവന്നിരിക്കുന്നത്. അതിന് പിന്നാലെയാണ് ഗൗതം മേനോന്‍ എത്തുന്നത്.