സംവിധായകനും നടനുമായ ദിലീഷ് പോത്തന്റെ കോവിഡ് പരിശോധന ഫലം നെഗറ്റീവ്. ആഫ്രിക്കൻ രാജ്യമായ ജിബൂട്ടിയിൽ ഷൂട്ടിങ് പൂർത്തിയാക്കി മടങ്ങിയെത്തിയ അദ്ദേഹം ക്വാറന്റീനിൽ കഴിയുകയായിരുന്നു. ക്വാറന്റീൻ പൂർത്തിയാക്കിയെന്നും പരിശോ​ധനാഫലം നെ​ഗറ്റീവ് ആണെന്നും ദിലീഷ് തന്നെയാണ് ഫെയ്സ്ബുക്ക് പേജിലൂടെ അറിയിച്ചത്. 

ദിലീഷ് പോത്തനടക്കം 71 പേരാണ് 'ജിബൂട്ടി' എന്ന ചിത്രത്തിന്റെ ഷൂട്ടിങ് സംഘത്തിലുണ്ടായിരുന്നത്. ചിത്രീകരണം പൂർത്തിയാക്കിയെങ്കിലും കോവിഡ് ലോക്ഡൗൺ മൂലം ജിബൂട്ടിയിൽ കുടുങ്ങുകയായിരുന്നു ഇവർ. ഏപ്രിൽ 14ന് ഷൂട്ടിങ് അവസാനിപ്പിച്ച് പ്രത്യേകമൊരുക്കിയ താമസസ്ഥലത്തായിരുന്നു സംഘം. ജൂൺ ആറിന് എയർ ഇന്ത്യ വിമാനത്തിൽ തിരിച്ചെത്തിയ സിനിമാ സംഘം ക്വാറന്റീനിലായിരുന്നു. സംഘത്തിലെ മൂന്ന് പേർക്ക് കോവിഡ് സ്ഥിരീകരിച്ചിട്ടുണ്ട്.

എസ്.ജെ. സിനു സംവിധാനം ചെയ്യുന്ന ചിത്രമാണ് ജിബൂട്ടി.