കൊച്ചി : അനുഭവങ്ങളുടെ വെളിച്ചത്തിലാണ് താരങ്ങള്‍ രാഷ്ട്രീയത്തിലേക്ക് വരുന്നതെന്ന് തമിഴ്‌നടന്‍ സൂര്യ. സമൂഹത്തിനു വേണ്ടി നന്മ ചെയ്യണമെന്ന തോന്നലാണ് ഇതിന് പിന്നിലെന്നും താരം പറഞ്ഞു. രജനീകാന്തിന്റെയും കമല്‍ഹാസന്റെയും രാഷ്ട്രീയ പ്രവേശനം സംബന്ധിച്ച ചോദ്യത്തിന് മറുപടി പറയുകയായിരുന്നു അദ്ദേഹം. 

തമിഴ്‌നാട്ടിലെ മുതിര്‍ന്ന താരങ്ങളുടെ രാഷ്ട്രീയപ്രവേശനം സ്വാഗതാര്‍ഹമാണ്. താരങ്ങളുടെ നടപടിയെ സ്വാഗതം ചെയ്യുന്നു. രജനീകാന്തിന്റെ രാഷ്ട്രീയപ്രവേശനത്തിന്റെ ഫലം കാത്തിരുന്ന് കാണാമെന്നും സൂര്യ അഭിപ്രായപ്പെട്ടു. 

പുതിയ ചിത്രമായ താനാ സേര്‍ന്ത കൂട്ടത്തിന്റെ പ്രചാരണത്തിനായി കൊച്ചിയിലെത്തിയപ്പോഴാണ് സൂര്യ, നിലപാട് വ്യക്തമാക്കിയത്. ഒരാള്‍ ആത്മീയതയെ മുറുകെ പിടിച്ച് രാഷ്ട്രീയത്തിലേക്ക് വരുന്നു. മറ്റേയാള്‍ മതങ്ങളേ വേണ്ടെന്ന അഭിപ്രായക്കാരനും. രജനിയുടെയും കമലിന്റെയും പേര് പരാമര്‍ശിക്കാതെ സൂര്യ പറഞ്ഞു. എന്നാല്‍ താന്‍ രാഷ്ട്രീയത്തിലേക്ക് ഇല്ലെന്നും സൂര്യ വ്യക്തമാക്കി.