നടിയും ഡബ്ബിങ് ആർട്ടിസ്റ്റുമായി മലയാള സിനിമയിൽ നിറഞ്ഞു നിൽക്കുന്ന നടിയാണ് സീനത്ത്. ചെറുതും വലുതുമായ നിരവധി കഥാപാത്രങ്ങൾ ഇതിനോടകം സീനത്ത് ജീവൻ നൽകി. ഇപ്പോൾ സംവിധാനത്തിലേക്ക് ചുവടുവെച്ചിരിക്കുകയാണ് സീനത്ത്. രണ്ടാം നാൾ എന്ന സിനിമയാണ് സീനത്ത് സംവിധാനം ചെയ്തത്.

മകൻ ജിതിൻ മുഹമ്മദ് പ്രധാന വേഷത്തിൽ എത്തുന്ന ചിത്രത്തിന്റെ കഥയും തിരക്കഥയും ഒരുക്കിയിരിക്കുന്നത് സീനത്ത് തന്നെയാണ്. പുതുമുഖ താരം ശ്രീലക്ഷ്മിയാണ് നായികയായി എത്തുന്നത്. താരത്തിന്റെ ജന്മദേശമായ നിലമ്പൂരാണ് സിനിമയുടെ പ്രധാന ലൊക്കേഷൻ. മഹേഷ് മാധവൻ ആണ് ചിത്രത്തിന്റെ ഛായാഗ്രാഹകൻ. ദിപുൽ മാർത്തോ, അജയ് മാത്യു, അക്രം ലിമുശങ്കർ തുടങ്ങിയവരാണ് മറ്റു കഥാപാത്രങ്ങളായി എത്തുന്നത്.

സംവിധാനം കണ്ടുപഠിച്ചതാണ് എന്നാണ് സീനത്ത് പറയുന്നത്. നിരവധി സംവിധായകർക്കൊപ്പം പ്രവർത്തിച്ച അനുഭവമുണ്ടെന്നും അവരുടെ സംവിധായക രീതി തന്നെ ആകർഷിച്ചിട്ടുണ്ടെന്നുമാണ് സീനത്ത് വ്യക്തമാക്കി. 16 ദിവസം കൊണ്ടാണ് ഷൂട്ടിങ് പൂർത്തിയാക്കിയത്. ഫാമിലി ത്രില്ലറാണു ‘രണ്ടാം നാൾ’. എവിഎ പ്രൊഡക്‌ഷൻസിനു വേണ്ടി എ.വി.അനൂപാണു നിർമാണം.