ഒരൊറ്റ ചിത്രം കൊണ്ട് ബോളിവുഡില്‍ ഹിറ്റായ താരമാണ് ഇഷാന്‍ ഖട്ടര്‍. ശ്രീദേവിയുടെ മകള്‍ ജാന്‍വി കപൂറിനൊപ്പം ദഡക്ക് എന്ന ചിത്രത്തിലൂടെയാണ് ഇഷാന്‍ ചലച്ചിത്രരംഗത്തേക്ക് കടന്നുവന്നത്. ഇപ്പോള്‍ താരത്തിന്റെ ബൈക്ക് ട്രാഫിക് പൊലീസ് വാഹനത്തില്‍ കയറ്റിക്കൊണ്ടുപോകുന്ന ഒരു വീഡിയോയാണ് സമൂഹമാധ്യമങ്ങളില്‍ ട്രെന്‍ഡിങ് ആകുന്നത്. 

നോ പാര്‍ക്കിങ് ഏരിയയില്‍ പാര്‍ക്ക് ചെയ്ത വണ്ടി ട്രാഫിക് പൊലീസ് കസ്റ്റഡിയിലെടുക്കുകയായിരുന്നു. പൊലീസ്, ബൈക്ക് ട്രക്കില്‍ കയറ്റി സ്‌റ്റേഷനിലേയ്ക്ക് കൊണ്ടുപോകുന്നതിന്റെ ദൃശ്യങ്ങളും അവിടെ നിന്നും പിഴയടച്ചു ബൈക്കുമായി പോകുന്ന ദൃശ്യങ്ങളും സമൂഹമാധ്യമങ്ങളില്‍ പ്രചരിക്കുന്നുണ്ട്.  

മുംബൈയിലെ ഒരു റെസ്‌റ്റോറിന്റിന്റെ മുന്നില്‍ നിന്നാണ് ഇഷാന്റെ ബൈക്ക് പൊലീസ് പൊക്കിയത്. അനധികൃത പാര്‍ക്കിങ്ങിന് 500 രൂപ പിഴ അടച്ചതോടെ പൊലീസ് താരത്തിന് ബൈക്ക് വിട്ടു നല്‍കി. ബൈക്ക് തിരികെ കിട്ടിയതിന് ശേഷം ഏറെ സന്തോഷത്തോടെയാണ് ഇഷാന്‍ ഹെല്‍മെറ്റുമെടുത്ത് തന്റെ യാത്ര തുടര്‍ന്നത്.