പ്രഭാസിന്റെ ബിഗ് ബജറ്റ് ചിത്രം സാഹോ തീയറ്ററില്‍ എത്തി മണിക്കൂറുകള്‍ക്കകം ഇന്റര്‍നെറ്റില്‍. സിനിമകളുടെ വ്യാജ പതിപ്പ് ഇന്റര്‍നെറ്റില്‍ എത്തിക്കുന്നതില്‍ കുപ്രസിദ്ധരായ തമിള്‍ റോക്കേഴ്‌സ് തന്നെയാണ് സാഹോയ്ക്കും വില്ലനായിരിക്കുന്നത്. 

ഇന്നു രാവിലെയാണ് പ്രഭാസും ശ്രദ്ധാ കപൂറും പ്രധാന വേഷങ്ങളില്‍ എത്തുന്ന സാഹോ തിയറ്ററുകളില്‍ എത്തിയത്. വലിയ ബജറ്റില്‍ നിര്‍മിച്ച ചിത്രം ബോക്‌സ് ഓഫിസില്‍ വന്‍ ചലനമുണ്ടാക്കുമെന്ന പ്രതീക്ഷയിലാണ് അണിയറ പ്രവര്‍ത്തകര്‍. സാഹോ ബാഹുബലിയുടെ റെക്കോഡ് തകര്‍ക്കുമെന്ന് പ്രഭാസ് തന്നെ അഭിപ്രായപ്പെട്ടിരുന്നു. ഈ പ്രതീക്ഷകളുടെയെല്ലാം കടക്കല്‍ കത്തിവച്ചാണ് ചിത്രത്തിന്റെ വ്യാജ പതിപ്പ് ഓണ്‍ലൈനില്‍ പ്രത്യക്ഷപ്പെട്ടത്.

സോഷ്യല്‍ മീഡിയ വഴി പ്രചരിക്കുന്ന ഡൗണ്‍ലോഡ് ലിങ്കുകള്‍ ഏതു വിധേയനും തടയാനുള്ള ശ്രമത്തിലാണ് സാഹോയുടെ അണിയറപ്രവര്‍ത്തകര്‍. ഇതിനായി ഔദ്യോഗിക ഏജന്‍സികളുടെ സഹായം തേടിയിട്ടുണ്ട്. 

തെലുഗ്, തമിഴ്, മലയാളം, ഹിന്ദി ഭാഷകളിലാണ് സാഹോ ഒരേസമയം റിലീസ് ചെയ്തത്. തിയറ്ററുകളില്‍നിന്ന് ചിത്രത്തിന് സമ്മിശ്ര പ്രതികരണമാണെന്നാണ് പ്രാഥമിക റിപ്പോര്‍ട്ടുകള്‍.