മുംബൈ: ബോളിവുഡിലെ മഹാനടൻ അമിതാഭ് ബച്ചൻ മറാത്തി സിനിമയിൽ ബച്ചനായി തന്നെ എത്തുന്നു. മുതിർന്ന നടനും നാടക പ്രവർത്തകനുമായ വിക്രം ​ഗോഖലെ സംവിധാനം ചെയ്യുന്ന ചിത്രത്തിലൂടെയാണ് ബി​ഗ് ബി അതിഥി താരമായെത്തുന്നത്. മിലിന്ദ് ലെലെ തിരക്കഥയെഴുതുന്ന 'എബി അനി സിഡി'യിൽ മെ​ഗാ സ്റ്റാറായി തന്നെയാണ് ബച്ചന്റെ വേഷം. 

സ്കൂൾ ജീവിത കാലത്തിന് ശേഷം പിരിഞ്ഞ കൂട്ടുകാർ 70 വർഷത്തിന് ശേഷം കണ്ടുമുട്ടുന്നതാണ് ചിത്രത്തിന്റെ പ്രമേയം. അമിതാബ് ബച്ചൻ എന്ന പേരിന്റെ എബിയും ​ഗോഖലെയുടെ കഥാപാത്രമായ ചന്ദ്രകാന്ത് ദേശ്പാണ്ഡെ എന്ന പേരിന്റേയും ചരുക്ക രൂപമായി സിഡിയും ചേർന്നതാണ് 'എബി അനി സിഡി'. ചിത്രത്തിലേക്ക് ബച്ചന്റെ പേര് നിർദേശിച്ചത് ​ഗോഖലെ തന്നെയാണ്. ബാല്യകാല സുഹൃത്തുക്കളായാണ് ഇരുവരും ചിത്രത്തിലെത്തുന്നതെന്ന് നിർമാതാവ് അക്ഷയ് ബർദപുർകർ പറഞ്ഞു. 

ഈ വർഷം ഡിസംബറിലാവും ഈ ഹാസ്യ കുടുംബ ചിത്രത്തിന്റെ റിലീസ്. 76കാരനായ ബച്ചനും 78കാരനായ ​ഗോഖലെയും 'അ​ഗ്നിപഥ്', 'ഖുദാ ​ഗവാ' തുടങ്ങി ഓട്ടേറെ ചിത്രങ്ങളിൽ ഒന്നിച്ചഭിനയിച്ചിട്ടുണ്ട്. 

രൺബിർ കപൂർ- ആലിയ ഭട്ട് എന്നിവരഭിനയിക്കുന്ന 'ബ്രഹ്മാസ്ത്ര' നാ​ഗാരാജ് മഞ്ജുലെയുടെ ആ​ദ്യ ഹിന്ദി ചിത്രമായ 'ഝുണ്ട്' ആയുഷ്മാൻ ഖുരാനയ്ക്കൊപ്പമുള്ള കുടുംബ ചിത്രമായ ​'​ഗുലാബോ സിതാബോ' ഇമ്രാൻ ഹാഷ്മിയ്ക്കൊപ്പമുള്ള ത്രില്ലർ ചിത്രം 'ചെഹരെ' എന്നീ സിനിമകളുടെ പണിപ്പുരയിലാണ് അമിതാഭ് ബച്ചൻ.