ഹൈദരാബാദ്‌: ബാഹുബലിയിലെ ബെല്ലാരിദേവനിലൂടെ മലയാളികൾക്ക് സുപരിചിതനാണ് തെലുങ്കു നടൻ റാണ ദ​ഗുബട്ടി. ബാഹുബലി എന്ന ചിത്രത്തിലൂടെ നടൻ പ്രഭാസിനൊപ്പം റാണയും ഇന്ത്യൻ സിനിമാ ആരാധകരുടെ മനസ്സ് കീഴടക്കിയിരുന്നു. എന്നാൽ ഇപ്പോൾ റാണയുടെ ആരോ​ഗ്യ സംബന്ധമായ വാർത്തകളാണ് തെലുങ്കു സിനിമാലോകത്ത് പ്രചരിക്കുന്നത്. 

റാണ വൃക്കരോ​ഗത്തിന് അമേരിക്കയിൽ ചികിൽസയിലാണെന്നാണ് തെലുങ്കുമാധ്യമങ്ങൾ റിപ്പോർട്ട് ചെയ്യുന്നത്. അദ്ദേഹത്തിന്റെ വൃക്ക മാറ്റിവെക്കൽ ശസ്ത്രക്രിയ ഉടൻ ഉണ്ടായേക്കുമെന്നും റിപ്പോർട്ടുകളുണ്ട്. റാണയ്ക്ക് അമ്മ വൃക്ക ദാനം ചെയ്യുമെന്നും തെലുങ്ക് മാധ്യമങ്ങള്‍ റിപ്പോര്‍ട്ട് ചെയ്യുന്നു. 

എന്നാല്‍ അത് സംബന്ധിച്ച് ഔദ്യോഗിക സ്ഥിരീകരണങ്ങളൊന്നും ഇതുവരെ പുറത്ത് വന്നിട്ടില്ല. സാമൂഹിക മാധ്യമങ്ങളില്‍ സജീവമാണെങ്കിലും ചികിത്സയെ സംബന്ധിച്ച് പ്രചരിക്കുന്ന വാര്‍ത്തകളോട് റാണ പ്രതികരിച്ചിട്ടില്ല. റാണയുടെ ട്വീറ്റുകള്‍ക്ക് ആരാധകരില്‍ ചിലര്‍ രോഗവിവരങ്ങള്‍ തിരക്കുന്നുമുണ്ട്.  

നേരത്തെയും റാണയുടെ ആരോ​ഗ്യം സംബന്ധിച്ച് വാര്‍ത്തകൾ പ്രചരിച്ചിരുന്നു. അന്ന് റാണയുടെ പിതാവ് ഡി സുരേഷ് ബാബു, മകന് കണ്ണുസംബന്ധമായ ചില പ്രശ്നങ്ങൾ ഉണ്ടെന്നതൊഴിച്ചാൽ, മറ്റ് ശാരീരിക പ്രശ്നങ്ങളില്ലെന്നായിരുന്നു പ്രതികരിച്ചത്. സായി പല്ലവി നായികയായ വിരാട പർവം ആണ് റാണയുടേതായി അടുത്ത് റിലീസ് ചെയ്യാനുള്ള തെലുങ്ക് ചിത്രം.