ദീപിക പദുക്കോണും പ്രിയങ്ക ചോപ്രയും കങ്കണ റണാവത്തും തിളങ്ങിയ കാന്‍ റെഡ് കാര്‍പ്പറ്റിലേക്ക് ഒടുവില്‍ താരസുന്ദരി ഐശ്വര്യ റായ് ബച്ചനും എത്തി. 72-ാമത് കാന്‍ ചലച്ചിത്രോത്സവത്തില്‍ ആഷിന്റെ ആദ്യ ദിനമായിരുന്നു ഇന്നലെ. സ്വര്‍ണ്ണ നിറത്തിലുള്ള മെറ്റാലിക് ഗൗണില്‍ ഒരു മത്സ്യകന്യകയെ പോലെയാണ് ആഷ് നടന്നുനീങ്ങിയത്. 

പിന്നിലേക്ക് പല പാളികളായി നീണ്ടു കിടക്കുന്ന ടെയിന്‍ ആണ്‌ ആഷിന്റെ ലുക്കില്‍ ഏറെ ശ്രദ്ധേയമായത്. ഒരു വശം ഫുള്‍സ്ലീവും മറുവശം സ്ലീവ്‌ലെസ്സുമായി ഡിസൈന്‍ ചെയ്ത ഗൗണിന്റെ നെക്ക് ലൈന്‍ ഫാഷന്‍ പ്രേമികളെ ഏറെ ആകര്‍ഷിക്കുന്നതാണ്. വളരെ കുറച്ചുമാത്രം ആഭരണങ്ങള്‍ ധരിച്ചിരുന്ന ഐശ്വര്യയുടെ ഇരു കൈകളിലെയും മോതിരവും ക്യാമറയില്‍ ശ്രദ്ധിക്കപ്പെട്ടു. 

മകള്‍ ആരാധ്യയും ഐശ്വര്യയ്‌ക്കൊപ്പം കാനില്‍ എത്തിയിട്ടുണ്ട്. മുന്‍ വശം കയറിയും പിന്നിലേക്ക് ഇറങ്ങിയും കിടക്കുന്ന മഞ്ഞ ഫ്രോക്ക് ധരിച്ചാണ് ആരാധ്യ എത്തിയത്. ഉടുപ്പില്‍ ചേര്‍ത്തിരുന്ന വലിയ പൂവ് കുട്ടിത്തതിന് കൂടുതല്‍ തിളക്കമേകി. "മൈ സണ്‍ഷൈന്‍ ഫോറെവര്‍. ലവ് യൂ", എന്ന് കുറിച്ചാണ് ആരാധ്യയ്‌ക്കൊപ്പമുള്ള ചിത്രം ആഷ് ഇന്‍സ്റ്റഗ്രാമില്‍ പങ്കുവച്ചിരിക്കുന്നത്.