ഹൃദയ ശസ്ത്രക്രിയയ്ക്ക് വിധേയനായ ഹോളിവുഡ് നടൻ അർണോൾഡ് ഷ്വാർസ്നെ​ഗർ ആരോ​ഗ്യം വീണ്ടെടുത്തു തുടങ്ങി. ചികിത്സയിലിരുന്ന ക്ലീവ്ലാൻഡ് ക്ലിനിക്കിലെ ജീവനക്കാർക്ക് നന്ദി പറഞ്ഞു കൊണ്ട് പങ്കുവച്ച കുറിപ്പിലാണ് ആരോ​ഗ്യസ്ഥിതിയെക്കുറിച്ച് അർണോൾഡ് പങ്കുവച്ചത്. 

രണ്ടാമതും ഹൃദയ ശസ്ത്രക്രിയയ്ക്ക് വിധേയനായ താരം, താൻ ഇപ്പോൾ വളരെ ഉന്മേഷവാനാണെന്ന് ആരാധകരെ അറിയിച്ചു. 1997ൽ ഹൃദയസംബന്ധമായ അസുഖത്തെ തുടർന്നാണ് അർണോൾഡിന് പൾമോണറി വാൽവ് ഘടിപ്പിക്കേണ്ടി വന്നത്. 2018 ൽ ഇത് വീണ്ടും മാറ്റി ഘടിപ്പിച്ചിരുന്നു.

നേരത്തെ കോവിഡ് പ്രവർത്തനങ്ങളിൽ ഏർപ്പെടുന്ന ആരോഗ്യപ്രവർത്തകർക്ക് അർണോൾഡ് സഹായമെത്തിച്ചിരുന്നു. അമേരിക്കയിലെ ആരോഗ്യപ്രവർത്തനങ്ങൾക്കു വേണ്ട മെഡിക്കൽ ഉപകരണങ്ങൾ വാങ്ങിക്കുന്നതിനായി പത്ത് കോടി രൂപയാണ് നടൻ സംഭാവന നൽകിയത്. അർണോൾഡിനെ പ്രശസ്തനാക്കിയ ടെർമിനേറ്റർ സീരീസിലെ ആറാമത്തെ ചിത്രം 'ടെർമിനേറ്റർ: ഡാർക്ക് ഫേറ്റ്' കഴിഞ്ഞ വർഷമാണ് പുറത്തിറങ്ങിയത്.