മുംബൈ: ആശുപത്രിയില്‍ കഴിയുന്ന ഗായിക ലതാ മങ്കേഷ്‌കറുടെ ആരോഗ്യ നിലയില്‍ പുരോഗതി. ലതാ മങ്കേഷ്‌കറുടെ നില മെച്ചപ്പെട്ടിട്ടുണ്ടെന്നും അവര്‍ നിരീക്ഷണത്തിലാണെന്നും ആശുപത്രി വൃത്തങ്ങളെ ഉദ്ധരിച്ചുകൊണ്ടുള്ള റിപ്പോര്‍ട്ടില്‍ പറയുന്നു. ശ്വാസ തടസത്തെത്തുടര്‍ന്ന് തിങ്കളാഴ്ച രാവിലെയാണ് ലതാ മങ്കേഷ്‌കറെ മുംബൈ ബ്രീച്ച് കാന്‍ഡി ആശുപത്രിയില്‍ പ്രവേശിപ്പിച്ചത്.

ലതാ മങ്കേഷ്‌കറുടെ നിലയില്‍ പുരോഗതിയുണ്ടന്ന് മുന്‍ കേന്ദ്രമന്ത്രി രാജീവ് ശുക്ല പറഞ്ഞു. ഗായികയുടെ കുടുംബാംഗങ്ങളെ സന്ദര്‍ശിച്ച ശേഷം ട്വിറ്ററിലാണ് രാജീവ് ശുക്ല ഇക്കാര്യം അറിയിച്ചത്. ലതാജി എത്രയും വേഗം സുഖം പ്രാപിക്കുമെന്ന് പ്രതീക്ഷിക്കുന്നതായും രാജീവ് ശുക്ല പറഞ്ഞു.

തിങ്കളാഴ്ച പുലര്‍ച്ചെ രണ്ടു മണിയോടെയാണ് ശ്വാസ തടസത്തെത്തുടര്‍ന്ന് തൊണ്ണൂറുകാരിയായ ലതാ മങ്കേഷ്‌കറെ ആശുപത്രിയില്‍ എത്തിച്ചത്. അവരെ ഉടന്‍ തന്നെ തീവ്ര പരിചരണ വിഭാഗത്തിലേക്കു മാറ്റി. ലതയുടെ നില വഷളായതായും വെന്റിലേറ്ററില്‍ ആണെന്നും ഇന്നലെ റിപ്പോര്‍ട്ടുകളുണ്ടായിരുന്നു. എന്നാല്‍ അവരോട് അടുത്ത വൃത്തങ്ങള്‍ ഇതു നിഷേധിച്ചു.

ലതാ മങ്കേഷ്‌കര്‍ മരുന്നുകളോടു പ്രതികരിക്കുന്നുണ്ടെന്നും നില മെച്ചപ്പെട്ടിട്ടുണ്ടെന്നും കുടുംബാംഗങ്ങള്‍ പറഞ്ഞു.