ടൊവിനോ തോമസും അഹാന കൃഷ്ണയും പ്രധാന കഥാപാത്രങ്ങളായി എത്തിയ ലൂക്കയിലെ ചുംബന രംഗം ഡിവിഡിയില്‍ നിന്ന് ഒഴിവാക്കിയത് വലിയ വിവാദമായിരുന്നു. ഇപ്പോള്‍ നീക്കം ചെയ്ത രംഗം യൂട്യൂബിലൂടെ പുറത്തുവിട്ടിരിക്കുകയാണ് സൈനാ വിഡിയോസ്. ഡിവിഡിയില്‍ നിന്ന് പ്രധാന രംഗങ്ങള്‍ വെട്ടിമാറ്റിയതിന് എതിരേ സംവിധായകന്‍ അരുണ്‍ ബോസ് രൂക്ഷ വിമര്‍ശനം നടത്തിയിരുന്നു. ലൂക്കയും നിഹാരികയും തമ്മിലുള്ള വളരെ ഇന്റിമേറ്റായ രംഗമായിരുന്നു ഇത്. ഈ രംഗമില്ലെങ്കില്‍ ലൂക്ക ഇല്ലെന്നുമാണ് സംവിധായകന്‍ പറഞ്ഞത്. തുടര്‍ന്ന് സംവിധായകന്റെ കുറിപ്പ് സോഷ്യല്‍ മീഡിയയില്‍ വൈറലാവുകയായിരുന്നു. തുടര്‍ന്ന് ഡിവിഡി പുറത്തിറക്കിയവര്‍ക്കെതിരേ പ്രതിഷേധം ശക്തമായതോടെയാണ് രംഗം പുറത്തുവിട്ടത്. 

സെന്‍സര്‍ബോര്‍ഡ് പോലും ഒഴിവാക്കരുത് എന്ന് പറഞ്ഞ രംഗമാണ് ഇതെന്നാണ് സംവിധായകന്‍ പറയുന്നത്. അത് സിനിമാറ്റിക് ഗിമ്മിക് അല്ലെന്നും വളരെ ആലോചിച്ചാണ് രംഗം എടുത്തതെന്നും അരുണ്‍ പറയുന്നു. രണ്ട് കഥാപാത്രങ്ങളും തമ്മിലുള്ള ആഴം വ്യക്തമാക്കുന്ന രംഗമാണ് ഇതെന്നും ഒരിക്കലും കാമം ഇതില്‍ ഇല്ലെന്നും അരുണ്‍ കൂട്ടിച്ചേര്‍ത്തു. മികച്ച അഭിപ്രായമാണ് ലൂക്ക നേടിയത്. ടൊവിനോയുടേയും അഹാനയുടേയും പ്രകടനവും ശ്രദ്ധിക്കപ്പെട്ടിരുന്നു.