ലോക്ക്ഡൗൺ പ്രഖ്യാപിച്ചതോടെ ഇത്രയും ദിവസങ്ങൾ എങ്ങനെ ‌ചെലവഴിക്കും എന്ന ചിന്തയിലായിരുന്നു പലരും. എന്നാൽ വളരെ ക്രിയേറ്റീവായാണ് നടൻ കോട്ടയം നസീർ 21 ദിവസങ്ങളും ചെലവഴിച്ചത്. ഓരോ ദിവസം ഓരോ ചിത്രങ്ങളാണ് നസീർ വരച്ചത്. ആരാധകർക്കിടയിൽ വൈറലാവുകയാണ് ചിത്രങ്ങൾ. 

കോട്ടയം നസീർ തന്നെയാണ് തന്റെ കഴിവ് ലോകത്തെ അറിയിച്ചത്. വിഡിയോ ആയിട്ടാണ് 21 ചിത്രങ്ങൾ താരം പങ്കുവെച്ചത്. 21 ദിവസം എങ്ങനെ തള്ളിനീക്കും എന്ന ചിന്തയായിരുന്നു പലർക്കും എന്നാൽ ഈ ദിവസങ്ങൾ എങ്ങനെയാണ് ഫലപ്രദമായി ഉപയോ​ഗിക്കേണ്ടത് എന്നാണ് ഞാൻ ആലോചിച്ചത് എന്നാണ് നസീർ പറയുന്നത്. ലോക്ക്ഡൗൺ നീട്ടിയതോടെ ചിത്രരചന തുടരാനാണ് തീരുമാനമെന്നും താരം  വ്യക്തമാക്കി. ‌മികച്ച പ്രതികരണമാണ് വിഡിയോക്ക് ലഭിക്കുന്നത്. 

ജയസൂര്യ, മാലാ പാർവതി തുടങ്ങിയ നിരവധി താരങ്ങൾ വിഡിയോ പങ്കുവെച്ചിട്ടുണ്ട്. അതിമനോഹരം നസീറിക്ക എന്ന അടിക്കുറിപ്പിനൊപ്പമാണ് വിഡിയോ പങ്കുവെച്ചിരിക്കുന്നത്. പ്രകൃതിയും, മൃ​ഗങ്ങളും മനുഷ്യരുമെല്ലാം നസീർ വരച്ചിട്ടുണ്ട്. ജീവസുറ്റ പെയന്റിങ് കണ്ട് അമ്പരന്നു നിൽക്കുകയാണ് ആരാധകർ. ലോക്ക്ഡൗണിന് ശേഷം ഈ ചിത്രങ്ങളെല്ലാം ചേർത്ത് ഒരു എക്സിബിഷൻ നടത്താനും പദ്ധതിയുണ്ട്.