മുംബൈ: ഇന്ത്യന്‍ ബാഡ്മിന്റണ്‍ താരം സൈന നേഹ്‌വാളിന്റെ ജീവിതം പറയുന്ന ചിത്രത്തില്‍ സൈനയാവുന്നത് പരിണീതി ചോപ്ര. നേരത്തെ ശ്രദ്ധ കപൂറിനെയായിരുന്നു സൈനയുടെ വേഷത്തിലേക്ക് പരിഗണിച്ചിരുന്നത്. ഇതിന്റെ ഭാഗമായി ശ്രദ്ധ ബാഡ്മിന്റണ്‍ പരിശീലനം വരെ ആരംഭിച്ചിരുന്നു. ഇന്ത്യന്‍ പരിശീലകന്‍ പുല്ലേല ഗോപീചന്ദിന്റെ കീഴിലായിരുന്നു ശ്രദ്ധയുടെ പരിശീലനം. അതിനിടെയാണ് അപ്രതീക്ഷിതമായി താരം ചിത്രത്തില്‍ നിന്ന് പിന്‍മാറുന്നത്. 

അമോല്‍ ഗുപ്‌തെയാണ് ചിത്രം സംവിധാനം ചെയ്യുന്നത്. പരസ്പര ധാരണയോടെയാണ് ശ്രദ്ധ ചിത്രത്തില്‍ നിന്ന് മാറുന്നതെന്ന് അണിയറ പ്രവര്‍ത്തകര്‍ വ്യക്തമാക്കി. മറ്റ് സിനിമകളുടെ തിരക്കുകള്‍ ചൂണ്ടിക്കാട്ടിയാണ് താരത്തിന്റെ പിന്‍മാറ്റം. ഒളിംപിക് വര്‍ഷം കൂടിയായ 2020ല്‍ ചിത്രം പുറത്തിറക്കാനാണ് ഉദ്ദേശിക്കുന്നതെന്ന് അണിയറ പ്രവര്‍ത്തകര്‍ പറയുന്നു. 

സൈനയെപ്പോലെയൊരു കരുത്തുറ്റ പെണ്‍കുട്ടിയെ അവതരിപ്പിക്കാന്‍ സാധിക്കുന്നതില്‍ സന്തോഷമുണ്ട്. അവസരം അപ്രതീക്ഷിതമായിരുന്നു. ലോകത്തിന് മുന്നില്‍ രാജ്യത്തിന്റെ യശസ്സുയര്‍ത്തിയ താരമാണ് സൈന. സൈനയെ അവതരിപ്പിക്കാനായി ബാഡ്മിന്റണ്‍ പരിശീലനത്തിനായി പരിണീതി ഒരുങ്ങുകയാണ്.