കേരളത്തിലെ അറിയപ്പെടുന്ന പത്രപ്രവര്‍ത്തകനായിരുന്ന സ്വദേശാഭിമാനി രാമകൃഷ്ണപിള്ളയുടെ ജീവിതം സിനിമയാകുന്നു. പത്രപ്രവര്‍ത്തകനും രാഷ്ട്രീയ നേതാവുമായ സെബാസ്റ്റ്യന്‍ പോളാണ് സ്വദേശാഭിമാനി രാമകൃഷ്ണപിളളയുടെ ജീവിതം അടിസ്ഥാനമാക്കി തിരക്കഥ എഴുതിയത്.  

സ്വദേശാഭിമാനി രാമകൃഷ്ണപിളളയുടെ സിനിമാറ്റിക്കായ ജീവിതത്തെ കുറിച്ചുളള ആഴത്തിലുളള പഠനങ്ങളാണ് ആ ജീവിതം സിനിമയാക്കാനുളള തീരുമാനത്തിനു പിന്നിലെന്ന് തിരക്കഥാകൃത്ത് പറയുന്നു. സെബാസ്റ്റ്യന്‍ പോളിന്റെ രാഷ്ട്രീയ നിരീക്ഷണങ്ങളുടെയും നിയമ വ്യാഖ്യാനങ്ങളുടെയും പതിവ് രീതിയില്‍ നിന്നും വ്യത്യസ്തമായിരിക്കും ഈ തിരക്കഥ.

ചരിത്രവും രാഷ്ട്രീയവുമെല്ലാം ഇഴ ചേരുന്ന ഈ സിനിമ തയാറാക്കാന്‍ കമല്‍ അടക്കമുളള സംവിധായകരുമായി ആശയവിനിമയം തുടരുകയാണ് സെബാസ്റ്റ്യന്‍ പോള്‍. എന്നാല്‍ കേരളം ഇന്നുവരെ കണ്ടതില്‍ വെച്ച് ഏറ്റവും ധീരനായ പത്രാധിപരെന്ന് വിശേഷിപ്പിക്കപ്പെടുന്ന സ്വദേശാഭിമാനിയെ അവതരിപ്പിക്കാന്‍ ഒരു മുഖം തിരക്കഥാകൃത്ത് മനസില്‍ കണ്ടിട്ടുണ്ട്.