യുണിസെഫ് ബ്രാന്‍ഡ് അംബാസിഡറായി എത്തിയോപ്പിയയില്‍ എത്തിയിരിക്കുകയാണ് നടി പ്രിയങ്ക ചോപ്ര. അഭയാര്‍ത്ഥികളായ കുട്ടികളുടെ പ്രശ്‌നങ്ങള്‍ ഉയര്‍ത്തിക്കാണിച്ചുകൊണ്ട് അവരിലേക്ക് ലോകശ്രദ്ധ എത്തിക്കുകയാണ് താര്ത്തിന്റെ ഉദ്ദേശം. എന്നാല്‍ പ്രിയങ്കയുടെ പ്രവര്‍ത്തനങ്ങളെ ചോദ്യം ചെയ്തുകൊണ്ട് രംഗത്തെത്തിയ ഒരു ആരാധകന് താരം നല്‍കിയ മറുപടിയാണ് ഇപ്പോള്‍ വാര്‍ത്തയാകുന്നത്. 

താരം സ്വന്തം രാജ്യത്തെ കുട്ടികള്‍ക്കായി എന്തു ചെയ്യുന്നു എന്നായിരുന്നു ആരാധകന്റെ ചോദ്യം. കുട്ടികളെല്ലാവരും കുട്ടികളാണെന്നും നമ്മളെല്ലാവരും ആഗോളപൗരന്മാരാണെന്നും ആരാധകനെ ഓര്‍മ്മിപ്പിച്ച പ്രിയങ്ക ലോകമെമ്പാടുമുള്ള നാളെയുടെ വാഗ്ദാനങ്ങളായ കുട്ടികളെ സംരക്ഷിക്കേണ്ടത് നമ്മുടെ ഉത്തരവാദിത്വമാണെന്ന് പറയുന്നു. യുണിസെഫുമായി സഹകരിച്ച് ഇന്ത്യയില്‍ താന്‍ ഒരുപാട് വര്‍ഷങ്ങള്‍ പ്രവര്‍ത്തിച്ചിട്ടുണ്ടെന്നും അത് തുടരുമെന്നും പ്രിയങ്ക പറഞ്ഞു.

എത്യോപ്യയിലെ അഭയാര്‍ത്ഥി ക്യാംപുകളില്‍ കഴിയുന്ന കുട്ടികളെ സന്ദര്‍ശിക്കുകയാണ് ഇപ്പോള്‍ താന്‍ ചെയ്യുന്നതെന്നും അവരുടെ കഥകള്‍ കേട്ട് അവരുടെ ശബ്ദമായി മാറുകയാണ് താനെന്ന് പ്രിയങ്ക പറഞ്ഞു. ലോകത്തിന് മുന്‍പില്‍ എന്റെ ശബ്ദം ഉപയോഗിച്ച് അവരുടെ ശബ്ദത്തെ ഉയര്‍ത്തുകയാണ് താനെന്നും താരം പറഞ്ഞു.