അബുദാബി: യു എ യിൽ താമസിക്കുന്നവരാണോ നിങ്ങൾ? സാഹസിക യാത്രകൾ പോകാൻ താല്പര്യമുണ്ടോ? എന്നാൽ ഈ അവസരം നിങ്ങൾ ഒരിക്കലും പാഴാക്കരുത്. യു എ യുടെ ചുട്ടു പൊള്ളുന്ന മരുഭൂമിയിലൂടെ പരമ്പരാഗത മാർഗങ്ങൾ ഉപയോഗിച്ച് 30 ദിവസം സഞ്ചരിക്കാൻ അവസരമൊരുക്കി ആക്റ്റീവ് അബുദാബി എന്ന സംഘടന. യു എ ഇയുടെ സംസ്കാരവും പൈതൃകവും മനസ്സിലാക്കാനുള്ള ഒരു മികച്ച അവസരം കൂടിയാണ് ഈ യാത്ര.

ഈ സാഹസിക യാത്രയ്ക്ക് അവസരം ലഭിക്കാൻ നിരവധി കടമ്പകൾ കടക്കണം. 18 മുതൽ 25 വയസ് വരെ പ്രായമുള്ളവർക്കാകും ഈ യാത്രയ്ക്ക് അവസരമുണ്ടാകുക. നിങ്ങൾ യു എ ഇയിലെ താമസക്കാരൻ ആയിരിക്കണം. ആക്റ്റീവ് അബുദാബി എന്ന വെബ്‌സൈറ്റ് വഴി നിങ്ങൾക്ക് പദ്ധതിയിൽ രജിസ്റ്റർ ചെയ്യാം. അപേക്ഷകരിൽ നിന്ന് 500 പേരെ ആദ്യ ഘട്ടത്തിൽ തിരഞ്ഞെടുക്കും. ഇവർക്ക് ഒട്ടക സവാരി,രാജ്യത്തിൻറെ പരമ്പരാഗത കരകൗശലവസ്തുക്കൾ, നാടൻകലകൾ എന്നിവ പരിചയപ്പെടുത്തും.

അതിന് ശേഷം, യാത്രയ്ക്ക് വേണ്ടിയുള്ള തയ്യാറെടുപ്പുകളുടെ ഭാഗമായി ഒട്ടകങ്ങളുടെ ശരീരഘടന, വാട്ടർ ബാഗുകൾ, സാഡിൽ സ്ട്രാപ്പുകൾ പോലുള്ള പരമ്പരാഗത ഉപകരണങ്ങൾ എന്നിവയെക്കുറിച്ച് ക്ലാസുകൾ നൽകും. ഈ പരിശീലന ക്ലാസിൽ ഒട്ടകങ്ങളുമായി നേരിട്ട് ഇടപഴകാനും പരിപാലിക്കാനും അവസരമുണ്ട്.

എമിറേറ്റിന്റെ സംസ്കാരവുമായി ബന്ധപ്പെട്ട കോഫി തയ്യാറാക്കൽ മുതൽ നാടൻകലകളെക്കുറിച്ചുള്ള വർക്ക്ഷോപ്പുകളും അധികൃതർ പദ്ധതിയുടെ ഭാഗമായി ഒരുക്കിയിട്ടുണ്ട്.

ആഴ്ചയിൽ നാല് ദിവസമാകും ക്ലാസുകൾ നടക്കുക. വൈകുന്നേരം നാലു മണി മുതൽ രാത്രി എട്ട് മണി വരെയാണ് ക്ലാസുകളുടെ സമയം. വിജയകരമായി പരിശീലനം പൂർത്തിയാക്കുന്നവരിൽ നിന്ന് 100 പേരെ അവസാന യാത്രക്കായി തിരഞ്ഞെടുക്കും. ഇവരുമായി 30 ദിവസം കൊണ്ട് 1000 കിലോമീറ്റർ സഞ്ചരിക്കും. ഓഗസ്റ്റ് 21ന് രജിസ്‌ട്രേഷൻ ആരംഭിക്കുമെന്നാണ് റിപ്പോർട്ടുകൾ.