ദുബൈ: അനാവശ്യമായി അമിത ശബ്ദമുണ്ടാക്കുകയും അനുമതിയില്ലാതെ മാറ്റങ്ങള്‍ വരുത്തുകയും ചെയ്ത വാഹനങ്ങള്‍ക്കെതിരെ ദുബൈയില്‍ കടുത്ത നടപടി. ഒന്‍പത് മാസത്തിനിടെ 7,735 ഗതാഗത നിയമലംഘനങ്ങള്‍ റജിസ്റ്റര്‍ ചെയ്തതായും 1,630 വാഹനങ്ങള്‍ പിടിച്ചെടുത്തതായും ദുബൈ പൊലീസ് അറിയിച്ചു.

അമിത ശബ്ദമുണ്ടാക്കിയതിന് 2,045 നിയമലംഘനങ്ങളും 333 വാഹനങ്ങളും പിടിച്ചെടുത്തു. എഞ്ചിനിലോ ബോഡിയിലോ അനുമതിയില്ലാതെ മാറ്റങ്ങള്‍ വരുത്തിയതിന് 5,690 നിയമലംഘനങ്ങള്‍ റിപ്പോര്‍ട്ട് ചെയ്യുകയും 1,297 വാഹനങ്ങള്‍ കണ്ടുകെട്ടുകയും ചെയ്തു. രാത്രികാലങ്ങളില്‍ താമസക്കാര്‍ക്ക് ബുദ്ധിമുട്ടുണ്ടാക്കുന്ന തരത്തില്‍ വാഹനം ഓടിക്കുന്നത് തടയാനും റോഡ് സുരക്ഷ ഉറപ്പാക്കാനുമാണ് പരിശോധന ശക്തമാക്കിയത്.

നിയമലംഘകര്‍ക്കെതിരെ കര്‍ശന നടപടിയാണ് യുഎഇ ട്രാഫിക് നിയമപ്രകാരം സ്വീകരിക്കുന്നത്. അമിത ശബ്ദമുണ്ടാക്കുന്ന രീതിയില്‍ വാഹനമോടിച്ചാല്‍ 2,000 ദിര്‍ഹം പിഴയും 12 ബ്ലാക്ക് പോയിന്റും ലഭിക്കും. എഞ്ചിനിലും ബോഡിയിലും മാറ്റം വരുത്തിയാല്‍ 1,000 ദിര്‍ഹം പിഴയും 12 ബ്ലാക്ക് പോയിന്റും 30 ദിവസത്തേക്ക് വാഹനം പിടിച്ചെടുക്കലുമാണ് ശിക്ഷ.