കുവൈത്ത് സിറ്റി: വിദ്യാഭ്യാസ സ്ഥാപനങ്ങളിലെ സൂപ്പർവൈസർ,വകുപ്പ് മേധാവി തസ്തികകളിൽ സ്വദേശിവവൽക്കരണം നടപ്പിലാക്കാനൊരുങ്ങി കുവൈത്ത്. 2026–27 അധ്യയന വർഷത്തോടെ കുവൈത്ത് പൗരൻമാരെ ഈ ജോലികൾക്കായി നിയോഗിക്കും. വിദ്യാഭ്യാസമേഖലകളിൽ കൂടുതൽ സ്വദേശികളെ ഉൾപ്പെടുത്തുന്നതിന്റെ ഭാഗമായി ആണ് നടപടി.

നിലവിൽ സൂപ്പർവൈസർ, വകുപ്പ് മേധാവി തുടങ്ങിയ മേഖലകളിൽ ജോലി ചെയ്ത് വരുന്ന വിദേശികളുടെ എണ്ണം ശേഖരിക്കാൻ സർക്കാർ ആരംഭിച്ചു. ഈ വിവരങ്ങൾ ലഭ്യമായതിനു ശേഷം പ്രവാസികളുടെ സേവനം അവസാനിപ്പിക്കുകയും ബന്ധപ്പെട്ട വിഷയങ്ങളിൽ സ്വദേശികളെ നിയമിക്കാൻ വേണ്ട നടപടികൾ സർക്കാർ ആരംഭിക്കുകയും ചെയ്യും എന്നാണ് റിപ്പോർട്ടുകൾ.

ഇതോടൊപ്പം വരാനിരിക്കുന്ന സൂപ്പർവൈസറി പ്രമോഷൻ പരീക്ഷയിൽ വിജയിക്കുന്ന കുവൈത്ത് അധ്യാപകർക്ക് ജോലി നൽകുന്നതിനായി എത്ര ഒഴിവുകൾ ഉണ്ടാകുമെന്നതും മന്ത്രാലയം പരിശോധിച്ച് വരികയാണ്. അധ്യാപക മേഖലയിലെ വിദേശികളെ ഒഴിവാക്കി പൗരന്മാരെ നിയമിക്കാനാണ് സർക്കാർ ലക്ഷ്യം.