മസ്കത്ത്: ഒമാനിൽ ജോലി ചെയ്ത് വരുന്ന എല്ലാ എൻജിനീയർമാരും നിർബന്ധമായും പ്രൊഫഷണൽ അക്രഡിറ്റേഷൻ എടുക്കണമെന്ന് സർക്കാർ അറിയിച്ചു. വർക്ക് പെർമിറ്റുകൾ പുതുക്കുന്നതിന് എൻജിനീയറിങ് പ്രൊഫഷണൽ അക്രഡിറ്റേഷൻ നിർബന്ധമാണെന്നും, നിയമം അടുത്ത മാസം ഒന്ന് മുതൽ ഉത്തരവ് പ്രാബല്യത്തിൽ വരുമെന്നും തൊഴിൽ മന്ത്രാലയം വ്യക്തമാക്കി.

പ്രൊഫഷണൽ ക്ലാസിഫിക്കേഷൻ സർട്ടിഫിക്കറ്റ് ലഭിക്കുന്നതിനായി ഒമാൻ സൊസൈറ്റി ഓഫ് എൻജിനീയേഴ്സിൽ ആണ് അപേക്ഷ നൽകേണ്ടത്. ഇനി ഒമാനിലേക്ക് വരാൻ ആഗ്രഹിക്കുന്ന എൻജിനീയർമാർക്കും ഈ സർട്ടിഫിക്കറ്റ് നിർബന്ധമാണെന്ന് അധികൃതർ അറിയിച്ചു.

അപേക്ഷകൾ ഒമാൻ സൊസൈറ്റി ഓഫ് എൻജിനീയേഴ്സിന്റെ കീഴിലെ സെക്ടറൽ സ്‌കിൽസ് യൂണിറ്റ് ഫോർ എൻജിനീയറിങ് വിഭാഗം പരിശോധിച്ച് പ്രൊഫഷണൽ അക്രഡിറ്റേഷൻ സർട്ടിഫിക്കറ്റ് നൽകും. പുതിയ വർക്ക് പെർമിറ്റിന് അപേക്ഷിക്കുന്ന സമയത്ത് രേഖകൾക്കൊപ്പം ഈ സർട്ടിഫിക്കറ്റ് കൂടി സമർപ്പിക്കണം എന്നാൽ മാത്രമേ അനുമതി ലഭിക്കുകയുള്ളു എന്നും അധികൃതർ വ്യക്തമാക്കി.

 ഒമാനിൽ അടുത്തിടെ അക്കൗണ്ടിങ്, ഫിനാൻസ്, ഓഡിറ്റിങ് മേഖലകളിൽ ജോലി ചെയ്യുന്ന എല്ലാ വ്യക്തികൾക്കും പ്രൊഫഷണൽ ക്ലാസിഫിക്കേഷൻ സർട്ടിഫിക്കറ്റ് നിർബന്ധമാക്കിയിരുന്നു. ഈ മേഖലയിൽ ജോലി ചെയ്യുന്നവർ സ്‌കിൽസ് യൂണിറ്റിൽ നിന്ന് പ്രൊഫഷനൽ സർട്ടിഫിക്കറ്റ് നേടണമെന്നും അധികൃതർ അറിയിച്ചിരുന്നു.