ദുബൈ: യു എ ഇയിലെ ആദ്യത്തെ വെർച്വൽ കുടുംബാംഗത്തിന്റെ പേര് കണ്ടെത്തി. 14000 ആളുകളാണ് പേര് കണ്ടെത്താനായുള്ള മത്സരത്തിൽ വോട്ട് ചെയ്തത്. ഒടുവിൽ ദുബൈ,മിറ എന്നീ പേരുകൾ മറികടന്ന് ഏറ്റവും കൂടുതൽ വോട്ടുകൾ നേടി ലത്തീഫ വിജയി ആയി. അങ്ങനെ യു എ ഇയിലെ ആദ്യത്തെ വെർച്വൽ കുടുംബാംഗമായി ലത്തീഫ മാറി.

ലത്തീഫയുടെ ഈ എ ഐ കുടുംബത്തിൽ മൂന്ന് പേർ കൂടിയുണ്ട്. അച്ഛന്റെ പേര് മുഹമ്മദ്, അമ്മയുടെ പേര് സലാമ, റഷീദ് എന്നാണ് സഹോദരന്റെ പേര്. യു എ ഇയിൽ ആദ്യമായിട്ടാണ് ഒരു വെർച്വൽ എമിറാത്തി കുടുംബാംഗത്തെ ഔദ്യോഗികമായി പ്രഖ്യാപിച്ചത്. കുട്ടികളെയും കുടുംബങ്ങളേയും ആകർഷിക്കുന്ന തരത്തിലുള്ള പരമ്പരാഗത എമിറാത്തി വസ്ത്രം ധരിച്ചാണ് ലത്തീഫയും കുടുംബവും രംഗത്ത് എത്തിയത്.

ദുബൈയുടെ ഡിജിറ്റൽ ജീവിതത്തെക്കുറിച്ച് സംസാരിക്കുന്ന 'ഡിജിറ്റൽ അംബാസഡർ'മാരായി ഈ വെർച്വൽ കുടുംബം മാറുമെന്ന് അധികൃതർ വ്യക്തമാക്കി.

ഡിജിറ്റൽ ദുബൈയുടെ വിവിധ സംരംഭങ്ങൾ പ്രചരിപ്പിക്കാനും ജനങ്ങളെ സുരക്ഷിതവും ഉത്തരവാദിത്തപരവുമായ ഡിജിറ്റൽ പെരുമാറ്റം പ്രോത്സാഹിപ്പിക്കുകയും ചെയ്യുന്നതിനായി ലതീഫയും കുടുംബവും ഉടൻ തന്നെ സാമൂഹിക മാധ്യമങ്ങളിൽ പ്രത്യക്ഷപ്പെടും.