അഹമ്മദാബാദ്: ഭീകരസംഘടന അല്‍ ഖ്വയ്ദയുമായി ബന്ധമുള്ള നാലുപേര്‍ പിടിയില്‍. ഗുജറാത്ത് ഭീകരവിരുദ്ധ സ്‌ക്വാഡാണ് ഇവരെ അറസ്റ്റ് ചെയ്തത്. മൂന്നുപേര്‍ ഗുജറത്തില്‍ നിന്നും മറ്റൊരാള്‍ മറ്റൊരു സംസ്ഥാനത്തുനിന്നുമാണ് പിടിയിലായെന്ന് ഭീകരവിരുദ്ധ സ്‌ക്വാഡ് അറിയിച്ചു.

മുഹമ്മദ് ഫായിഖ്, മുഹമ്മഗ് ഫര്‍ദീന്‍, സൈഫുള്ള ഖുറേഷി, സീഷാന്‍ അലി എന്നിവരാണ് പിടിയിലായത്. അല്‍ഖ്വയ്ദയുടെ ആശയങ്ങള്‍ പ്രചരിപ്പിക്കുന്നതിനായി ഇവര്‍ സാമൂഹിക മാധ്യമങ്ങളും ആപ്പുകളും ഉപയോഗിച്ചതായി ഔദ്യോഗികവൃത്തങ്ങള്‍ അറിയിച്ചു. ആശയവിനിമയത്തിന്റെ തെളിവുകള്‍ നശിപ്പിക്കുക ലക്ഷ്യമിട്ട് ഇവര്‍ ഓട്ടോ- ഡിലീറ്റ് ആപ്പുകളാണ് ഉപയോഗിച്ചതെന്നും എടിഎസ് വൃത്തങ്ങള്‍ പറഞ്ഞു.

ഇവരെ കൂടുതല്‍ ചോദ്യം ചെയ്തുവരികയാണെന്ന് എടിഎസ് ഉദ്യോഗസ്ഥര്‍ പറഞ്ഞു. പ്രതികള്‍ക്ക് ദീര്‍ഘകാലമായി ഭീകരസംഘടനയുമായി ബന്ധമുണ്ടെന്നും ഇവരുടെ സോഷ്യല്‍ മീഡിയ അക്കൗണ്ടുകള്‍ പരിശോധിച്ചുവരികയാണെന്നും ഭീകരവിരുദ്ധ സ്‌ക്വാഡ് അറിയിച്ചു.