ഹൈദരബാദ്: ബന്ധുവീട്ടില്‍ പോയി ശല്യം ചെയ്തതിന് എട്ടുവയസുകാരന് പിതാവിന്റെ ക്രൂരമര്‍ദ്ദനം. ഭാര്യയുടെ പരാതിയെ തുടര്‍ന്ന് അച്ഛനെ പൊലീസ് കസ്റ്റഡിയിലെടുത്തു.  തെലങ്കാനയിലെ ഹൈദരബാദിലാണ് കേസിനാസ്പദമായ സംഭവം.

കര്‍ണാടകയിലെ ബിഡാര്‍ സ്വദേശിയാണ് പിതാവ്. ഇയാള്‍ ഒരു സെയില്‍സ്മാനായി ജോലി ചെയ്യുകയാണെന്ന് പൊലീസ് പറഞ്ഞു. അടുത്തിടെ ബന്ധുവായ ഒരു യുവതി മകനെതിരെ ഇയാളോട് പരാതി പറഞ്ഞിരുന്നു. ഇതില്‍ ഇയാള്‍ ഏറെ പ്രയാസപ്പെടുകയും ചെയ്തിരുന്നു. ഇതേതുടര്‍ന്ന് ഇയാള്‍ മകനെ വടികൊണ്ട് ഏറെ നേരം തല്ലുകയും ചെയ്തിരുന്നു. കുട്ടിയെ തല്ലുന്നതിന്റെ വീഡിയോ സഹോദരി വീഡിയോയില്‍ പകര്‍ത്തുകയും ചെയ്തിരുന്നു.

തുടര്‍ന്ന് കുട്ടിയുടെ അമ്മ ചതൃനാക്ക പൊലീസില്‍ പരാതി നല്‍കുകയായിരുന്നു. തുടര്‍ന്ന് പൊലീസ് പ്രതിയെ അറസ്റ്റ് ചെയ്തു. ജുവനൈല്‍ ജസ്റ്റിസിലെ വിവിധ വകുപ്പുകള്‍ പ്രകാരമാണ് ഇയാള്‍ക്കെതിരെ പൊലീസ് കേസ് എടുത്തിരിക്കുന്നത്.