പുനഃപ്പരീക്ഷകൾക്കായുള്ള ഓൺലൈൻ രജിസ്‌ട്രേഷൻ പ്രക്രിയ അണ്ണാ യൂണിവേഴ്‌സിറ്റി ആരംഭിച്ചു. 2021 ഫെബ്രുവരി / മാർച്ച് / ഏപ്രിൽ മാസങ്ങളിൽ നടന്ന 2020 നവംബർ- ഡിസംബർ മാസത്തെ പരീക്ഷകളിൽ പങ്കെടുത്ത വിദ്യാർത്ഥികൾക്കായി വീണ്ടും പരീക്ഷ നടത്തുന്നത് സംബന്ധിച്ച പ്രസ്താവനയും സർവകലാശാല പുറത്ത് വിട്ടിട്ടുണ്ട്. 

2020 നവംബർ-ഡിസംബർ പരീക്ഷകളിൽ രജിസ്റ്റർ ചെയ്യാത്ത വിദ്യാർത്ഥികൾക്ക് വീണ്ടും രജിസ്റ്റർ ചെയ്യാനും 2021 ജൂൺ-ജൂലൈ മാസങ്ങളിൽ നടക്കാനിരിക്കുന്ന പരീക്ഷകളിൽ പങ്കെടുക്കാനും അനുമതി നൽകിയിട്ടുണ്ട്.

നിശ്ചയിച്ച പഠന കാലയളവ് തീർന്ന വിദ്യാർത്ഥികൾക്കായി  ഓരോ പേപ്പറിനും സാധാരണ പരീക്ഷാ ഫീസോടൊപ്പം 5,000 രൂപ പ്രത്യേക ഫീസും നൽകണം. ബാക്കിയുള്ളവർ സാധാരണ ഫീസ് അടച്ചാൽ മതിയാവും.

കോവിഡ് -19 രൂക്ഷമായത് കാരണം, പ്രിവ്യൂ ഫോം, ഡിമാൻഡ് ഡ്രാഫ്റ്റ്‌ എന്നിവയുടെ വിശദീകരണത്തിനോ സമർപ്പിക്കലിനോ വ്യക്തിപരമായി സിഇഇ ഓഫീസ് സന്ദർശിക്കരുതെന്ന് വിദ്യാർത്ഥികളോട് അഭ്യർത്ഥിക്കുന്നുവെന്ന് യൂണിവേഴ്‌സിറ്റിയുടെ പ്രസ്താവനയിൽ പറയുന്നു. 2021 ജൂൺ 3 വരെ ഓൺലൈൻ രജിസ്‌ട്രേഷനായി അപേക്ഷിക്കാം. കൂടുതൽ അറിയാൻ സർവകലാശാലയുടെ വെബ്‌സൈറ്റ് സന്ദർശിക്കുക.