ബംഗളൂരു: പൊതു പരിപാടിക്കിടെ വഴക്കിട്ടു കര്‍ണാടകയിലെ കോണ്‍ഗ്രസ് എംപിയും ബിജെപി മന്ത്രിയും. ബെംഗളൂരു റൂറല്‍  മണ്ഡലത്തിലെ എംപിയും കോണ്‍ഗ്രസ് നേതാവുമായ ഡികെ സുരേഷും കര്‍ണാടക ഉന്നത വിദ്യാഭ്യാസ വകുപ്പ് മന്ത്രി സിഎന്‍ അശ്വത് നാരായണയും തമ്മിലാണു ഏറ്റുമുട്ടലുണ്ടായത്.

കര്‍ണാടക മുഖ്യമന്ത്രി ബസവരാജ് ബൊമ്മെ അടക്കമുള്ളവര്‍ പങ്കെടുത്ത പരിപാടിയിലാണു പോര്.  രാമനഗര ജില്ലയില്‍ നടന്ന പരിപാടിയില്‍ നാട്ടില്‍ വികസനം കൊണ്ടുവന്നത് ബിജെപിയാണെന്ന മന്ത്രിയുടെ പരാമര്‍ശമാണ് എംപിയെ ചൊടിപ്പിച്ചത്. പ്രകോപിതനായ ഡി.കെ. സുരേഷ് മന്ത്രിയുടെ അടുത്തേക്കു നടന്നടുക്കുകയായിരുന്നു. ഇരുവരും തമ്മില്‍ മൈക്ക് പോയിന്റില്‍ നിന്നു കൊണ്ടു വാക്കു തര്‍ക്കമായി. 

ഡികെ സുരേഷിന്റെ അനുയായികളും അശ്വത് നാരായണയ്‌ക്കെതിരെ തിരിഞ്ഞു. ഇതോടെ പരിപാടി അലങ്കോലമാകുകയായിരുന്നു. അശ്വത് നാരായണയ്‌ക്കെതിരെ പ്രതിഷേധവുമായി തെരുവിലിറങ്ങിയ കോണ്‍ഗ്രസ് പ്രവര്‍ത്തകര്‍  പരിപാടിയുടെ മുഴുവന്‍ പോസ്റ്ററുകളും വലിച്ച് കീറി.