പാമ്പും പരുന്തും ബദ്ധവൈരികളാണ് എന്നാണ് പൊതുവേ പറയാറ്. പരുന്തുകളുടെ പ്രധാന ഭക്ഷണമാണ് പാമ്പുകള്‍. അതുകൊണ്ട് തന്നെ പാമ്പുകളെ എവിടെ കണ്ടാലും പരുന്തുകള്‍ വിടാറില്ല. എന്നാല്‍ ഇവിടെ മൂര്‍ഖന്‍ പാമ്പിനെ ലക്ഷ്യമാക്കിയെത്തിയ പരുന്തിന് വിചാരിച്ച പോലെ അത്ര എളുപ്പമായിരുന്നില്ല ഇരതേടല്‍. മൂര്‍ഖന്‍ പാമ്പിനെ പിടിക്കാന്‍ ശ്രമിക്കുന്ന പരുന്തിന്റെ ദൃശ്യമാണ് ഇപ്പോള്‍ സമൂഹമാധ്യമങ്ങളില്‍ നിറയുന്നത്,

പത്തിവിരിച്ച് ചെറുത്തു നില്‍ക്കുന്ന പാമ്പിനെ പിടിക്കാന്‍ പറന്നിറങ്ങിയ പരുന്ത് ശ്രമിക്കുന്നത് ദൃശ്യത്തില്‍ വ്യക്തമാണ്. ചെന്നൈ നിവാസിയായ പക്ഷിനീരീക്ഷകനും വന്യജീവി ഫൊട്ടോഗ്രഫറുമായ കാര്‍ത്തിക് രാമമൂര്‍ത്തിയാണ് ദൃശ്യം പകര്‍ത്തിയത്. പരുന്ത് പുല്‍മേട്ടില്‍ പത്തിവിരിച്ചു നില്‍ക്കുന്ന മൂര്‍ഖന്‍ പാമ്പിനു മുന്നിലൂടെ തക്കം പാര്‍ത്തു നടക്കുന്നതും മെല്ലെ പറന്ന് റാഞ്ചാന്‍ ശ്രമിക്കുന്നതും കാണാം. എന്നാല്‍ അരികിലേക്കെത്തിയ പരുന്തിനെ കൊത്തിയോടിച്ചതോടെ പക്ഷി ഇരയെ ഉപേക്ഷിച്ച് ഭയന്നു പിന്‍മാറുകയായിരുന്നു.