ന്യൂഡൽഹി: അസമിൽ കോൺഗ്രസ് നേതാക്കൾ സഞ്ചരിച്ച വാഹനവ്യൂഹത്തിന് നേരെ കല്ലേറുണ്ടായതായി ആരോപണം. കോൺഗ്രസ് നേതാക്കളായ ഗൗരവ് ഗൊഗോയ്, ഭൂപേഷ് ബാഗൽ എന്നിവരാണ് വാഹനത്തിൽ ഉണ്ടായിരുന്നത്. അക്രമികൾ വാഹനത്തിന് നേരെ കല്ലും കുപ്പികളും വലിച്ചെറിഞ്ഞതായും സംഭവത്തിന് പിന്നിൽ ബിജെപി പ്രവർത്തകർ ആണെന്നുമാണ് കോൺഗ്രസിന്റെ ആരോപണം.

കോൺഗ്രസ് സ്ഥാനാർഥി സിബാമോനി ബോറയ്ക്ക് വേണ്ടി പ്രചാരണം നടത്താനാണ് നേതാക്കൾ നാഗോൺ മേഖലയിൽ എത്തിയപ്പോഴാണ് സംഭവം നടന്നത്. തെരഞ്ഞെടുപ്പ് പ്രചാരണങ്ങൾക്കായി ഇവർ സഞ്ചരിച്ച വാഹനത്തിന് നേരെ ആയിരുന്നു ആക്രമണം.

സംഭവത്തിൽ കാറിലുണ്ടായിരുന്ന എഐസിസി സെക്രട്ടറി മനോജ് ചൗഹാന് കല്ലേറിൽ വാരിയെല്ലിന് പരുക്കേറ്റതായും നേതാക്കൾ പറഞ്ഞു.

സംഭവത്തിന് പിന്നാലെ അസം മുഖ്യമന്ത്രി ഹിമന്ത ബിശ്വ ശർമയെയും തിരഞ്ഞെടുപ്പ് കമ്മിഷനെയും രൂക്ഷമായ ഭാഷയിലാണ് ഗൊഗോയ് വിമർശിച്ചത്. സംഭവത്തിന് പിന്നിലുള്ളവരെ കണ്ടെത്തുന്നതിൽ അസം പൊലീസ് പരാജയപ്പെടുമെന്നും തിരഞ്ഞെടുപ്പ് കമ്മിഷൻ സംഭവത്തിൽ നടപടിയെടുക്കില്ലെന്നും അദ്ദേഹം പറഞ്ഞു. രാഷ്ട്രീയ വിരോധം തീർക്കാൻ ഹിമന്ത ബിശ്വ ശർമ ഗുണ്ടകളെയിറക്കി അക്രമം അഴിച്ചു വിടുകയാണെന്ന് കോൺഗ്രസ് ജനറൽ സെക്രട്ടറി കെ.സി. വേണുഗോപാൽ പറഞ്ഞു.