ബംഗളൂരു: കര്‍ണാടകയില്‍ ഒരു ദയയുമില്ലാതെ തെരുവുനായയുടെ ദേഹത്ത് കൂടി ഓഡി കാര്‍ ഓടിച്ചുകയറ്റി. റോഡരികില്‍ കിടന്ന് ഉറങ്ങുന്ന തെരുവുനായയുടെ ദേഹത്ത്കൂടി ഡ്രൈവര്‍ മനഃപൂര്‍വ്വം കാര്‍ ഓടിച്ചു കയറ്റുന്നതിന്റെ ദൃശ്യങ്ങള്‍ വ്യാപകമായാണ് പ്രചരിക്കുന്നത്.

ബംഗളൂരുവില്‍ കഴിഞ്ഞ ബുധനാഴ്ചയാണ് സംഭവം. റെസിഡന്‍ഷ്യല്‍ കോളനിയില്‍ റോഡരികില്‍ കിടന്ന് ഉറങ്ങിയ തെരുവുനായയോടാണ് ക്രൂരത കാണിച്ചത്. ദൃശ്യങ്ങളില്‍ ഒന്നിലധികം തെരുവുനായ്ക്കളെ കാണാം. ഇതില്‍ ഒന്നിന്റെ മുകളിലൂടെയാണ് കാര്‍ ഓടിച്ചുകയറ്റിയത്.

ചെയ്യാന്‍ ഉറപ്പിച്ച മട്ടില്‍ ഓഡി കാര്‍ പിന്നോട്ടെടുക്കുന്നത് വീഡിയോയില്‍ വ്യക്തമാണ്. അതിന് ശേഷം മുന്നോട്ടെടുത്ത കാര്‍ തെരുവുനായ കിടക്കുന്ന ഭാഗത്ത് കൂടി ഓടിച്ചു കുതിച്ചുപായുന്നതാണ് വീഡിയോയുടെ അവസാനം. കൂട്ടത്തിലെ ഒന്നിനെ ആക്രമിച്ചത് കണ്ട് മറ്റു നായ്ക്കള്‍ കുരയ്ക്കുന്നതും വാഹനത്തിന്റെ പിന്നാലെ പായുന്നതും വീഡിയോയയില്‍ വ്യക്തമാണ്. സംഭവത്തില്‍ നായയ്ക്ക് ഗുരുതരമായി പരിക്കേറ്റു.ഓഡി ഡ്രൈവര്‍ക്കെതിരെ നിയമനടപടി സ്വീകരിക്കണമെന്ന് മൃഗസ്‌നേഹികള്‍ ആവശ്യപ്പെട്ടു.