ഡെറാഡൂണ്‍: ഉത്തരാഖണ്ഡിലെ ലക്സര്‍ മണ്ഡലത്തിലെ ബിജെപി മുന്‍ എംഎല്‍എ സഞ്ജയ് ഗുപ്ത വോട്ടര്‍മാര്‍ക്കെതിരെ നടത്തിയ പരാമര്‍ശം വിവാദമാകുന്നു. താന്‍ നല്‍കിയ കുടിവെള്ളം കുടിച്ചിട്ടും തനിക്ക് വോട്ട് ചെയ്തില്ലെങ്കില്‍ വയറ്റില്‍ വിരകള്‍ വരികയും വയര്‍ പൊട്ടുകയും ചെയ്യുമെന്നായിരുന്നു ബിജെപി നേതാവിന്റെ പരാമര്‍ശം.

ലക്സറില്‍ തന്റെ ജന്മദിനാഘോഷ പരിപാടിയില്‍ വെച്ചായിരുന്നു സഞ്ജയ് ഗുപ്തയുടെ പ്രസ്താവന. തന്റെ ഔദ്യോഗിക കാലയളവില്‍ നടപ്പിലാക്കിയ കുടിവെള്ള പദ്ധതികളെ കുറിച്ച് സംസാരിക്കുന്നതിനിടെയാണ് അദ്ദേഹം വോട്ടര്‍മാര്‍ക്ക് നേരെ ഭീഷണി മുഴക്കിയത്. സംഭവത്തിന്റെ വിഡിയോ സമൂഹമാധ്യമങ്ങളില്‍ പ്രചരിച്ചതോടെ വലിയ വിമര്‍ശനമാണ് ഉയരുന്നത്. വരാനിരിക്കുന്ന ഉത്തരാഖണ്ഡ് നിയമസഭാ തിരഞ്ഞെടുപ്പിന് മുന്നോടിയായി രാഷ്ട്രീയ വൃത്തങ്ങളില്‍ ഈ പരാമര്‍ശം വലിയ വിവാദമായിക്കഴിഞ്ഞു.

2012 മുതല്‍ 2022 വരെയുള്ള തന്റെ കാലയളവില്‍ റോഡ്, വൈദ്യുതി, കുടിവെള്ളം തുടങ്ങിയ മേഖലകളില്‍ നടത്തിയ വികസന പ്രവര്‍ത്തനങ്ങളെ ന്യായീകരിക്കുന്നതിനിടെയാണ് സഞ്ജയ് ഗുപ്ത വിവാദ പരാമര്‍ശം നടത്തിയത്. 2012ലെയും 2017ലെയും തെരഞ്ഞെടുപ്പുകളില്‍ ലക്സര്‍ മണ്ഡലത്തില്‍ നിന്ന് വിജയിച്ച സഞ്ജയ് ഗുപ്ത, 2022ല്‍ പരാജയപ്പെട്ടിരുന്നു.