ബംഗളൂരു: യെല്ലോ ലൈനില്‍ ഓടുന്ന ആദ്യ ഡ്രൈവറില്ലാ മെട്രോ ട്രെയിന്‍ ബംഗളരുവില്‍ എത്തി. ചൈനയില്‍ നിന്നാണ് ആറ് കോച്ചുകള്‍ ഉള്ള മെട്രോ ട്രെയിന്‍ എത്തിയതെന്ന് ബിഎംആര്‍സി അറിയിച്ചു. സൗത്ത് ബംഗളൂരുവിലെ ഐടി ഹബ്ബായ ഇലക്ട്രോണിക് സിറ്റിയിലെ ഹെബ്ബഗോഡി ഡിപ്പോയിലാണ് ഈ കോച്ചുകള്‍ എത്തിയത്.

ആര്‍വി റോഡില്‍ നിന്ന് സില്‍ക്ക് ബോര്‍ഡ് വഴി ഇലക്ട്രോണിക് സിറ്റിയിലേക്കുള്ള യെല്ലോ ലൈനിലാണ് ഈ ട്രെയിന്‍ സര്‍വീസ് നടത്തുക. മെട്രോ സര്‍വീസ് ആരംഭിക്കുന്നതിനുള്ള അവസാന ഘട്ട പരിശോധനയും പൂര്‍ത്തിയായി.

ബിഎംആര്‍സിഎല്ലിന് 216 കോച്ചുകള്‍ വിതരണം ചെയ്യുന്നതിനായി 2019 ലാണ് ചൈനീസ് സ്ഥാപനം 1,578 കോടി രൂപയുടെ കരാര്‍ നേടിയത്. കമ്മ്യൂണിക്കേഷന്‍ ബേസ്ഡ് ട്രെയിന്‍ കണ്‍ട്രോള്‍ (സിബിടിസി) സിഗ്‌നലിങ് സംവിധാനത്തിന്റെ ഭാഗമായാണ് ഈ ഡ്രൈവറില്ലാ ട്രെയിനുകള്‍ അവതരിപ്പിക്കുന്നത്.