ഭോപ്പാല്‍: രണ്ടുവയസുള്ള കൊച്ചുമകളെ പുള്ളിപ്പുലിയുടെ വായില്‍ നിന്ന് രക്ഷിച്ച് മുത്തച്ഛനും മുത്തശ്ശിയും. കുഞ്ഞിനെ രക്ഷിക്കാന്‍ സര്‍വശക്തിയുമെടുത്ത് പോരാടുന്നതിനിടെ ഒരു ഘട്ടത്തില്‍ മുത്തച്ഛനും മുത്തശ്ശിക്കും നേരെ പുലി തിരിഞ്ഞു. പുലിയുടെ ആക്രമണത്തില്‍ നിന്ന് രക്ഷപ്പെടാന്‍ ഒച്ചവെച്ചതോടെ നാട്ടുകാര്‍ ഓടിക്കൂടി. ഇത് കണ്ട പുലി കാട്ടിലേക്ക് ഓടിമറയുകയായിരുന്നു.

മധ്യപ്രദേശിലെ കുനോ നാഷണല്‍ പാര്‍ക്കിന് സമീപമാണ് വ്യാഴാഴ്ച രാത്രിയാണ് സംഭവം.വീട്ടില്‍ മുത്തശ്ശിയോടൊപ്പം ഉറങ്ങിക്കിടന്ന രണ്ടുവയസുകാരിയെ പുലി കടിച്ചെടുത്ത് കൊണ്ട് പോകാന്‍ ശ്രമിക്കുകയായിരുന്നു. നിലവിളിച്ച് കൊണ്ട് മുത്തശ്ശി പുലിയെ നേരിട്ടു. പുലിയുടെ വായില്‍ നിന്നും കുഞ്ഞിനെ തിരിച്ചുകിട്ടാന്‍ അവര്‍ സര്‍വശക്തിയുമെടുത്ത് പോരാടി. 

ഈ സമയം മറ്റൊരു മുറിയിലായിരുന്ന മുത്തച്ഛനും എത്തി. പിന്നീട് ഇരുവരും ചേര്‍ന്ന് പുലിയുടെ കണ്ണിലും മൂക്കിലും ശക്തമായി ഇടിച്ചു. അതിനിടെയാണ് പുലി പ്രായമായവര്‍ക്ക് നേരെ തിരിഞ്ഞത്. പുലിയുടെ ആക്രമണത്തിനിടെ ഒച്ചവെച്ചതോടെ പ്രദേശവാസികള്‍ വടിയും മറ്റുമായി ഓടിക്കൂടി.  ഇത് കണ്ട പുലി കുഞ്ഞിനെ ഉപേക്ഷിച്ച് കാട്ടിലേക്ക് ഓടി മറയുകയായിരുന്നുവെന്നാണ് റിപ്പോര്‍ട്ടുകള്‍.