ന്യൂഡല്ഹി: പാസ്പോര്ട്ട്, ആധാര് കാര്ഡ്, വോട്ടര് ഐഡി തുടങ്ങിയ രേഖകള് നിയമപരമായി പൗരത്വത്തിന്റെ അന്തിമ തെളിവല്ലെന്ന് വിദേശകാര്യ മന്ത്രാലയം വ്യക്തമാക്കിയത് രാജ്യത്ത് വലിയ ചര്ച്ചകള്ക്ക് വഴിവെച്ചിരിക്കുകയാണ്. പാസ്പോര്ട്ട് 'യാത്രാ രേഖ' മാത്രമാണെന്നും അത് പൗരത്വത്തിന്റെ അന്തിമ തെളിവല്ലെന്നുമാണ് സര്ക്കാര് നിലപാട്. ഇതോടെ പൗരത്വം തെളിയിക്കാന് പാസ്പോര്ട്ടല്ലെങ്കില് മറ്റെന്താണ് വേണ്ടതെന്ന ചോദ്യം ശക്തമായിരിക്കുകയാണ്.
പലരും പാസ്പോര്ട്ടിനെ പൗരത്വത്തിന്റെ ഏറ്റവും വലിയ തെളിവായി കാണുന്നുണ്ടെങ്കിലും നിയമപരമായി അതിന് ചില പരിമിതികളുണ്ട്. 1967ലെ പാസ്പോര്ട്ട് നിയമത്തിലെ 20-ാം വകുപ്പ് പ്രകാരം, പൗരന്മാരല്ലാത്ത വ്യക്തികള്ക്കും പൊതുതാല്പ്പര്യം മുന്നിര്ത്തി കേന്ദ്ര സര്ക്കാരിന് പാസ്പോര്ട്ടോ യാത്രാ രേഖയോ നല്കാന് അധികാരമുണ്ട്. പാസ്പോര്ട്ട് എന്നത് സര്ക്കാരിന്റെ സ്വത്താണ്. വിദേശ പൗരത്വം സ്വീകരിക്കുകയോ മറ്റോ ചെയ്താല് ഇത് സര്ക്കാരിന് തിരികെ നല്കാന് ഉടമ ബാധ്യസ്ഥനാണ്.
പാസ്പോര്ട്ട് കൈവശമുള്ളത് കൊണ്ട് മാത്രം ഒരാള് പൗരനാണെന്ന് ഉറപ്പിക്കാനാവില്ലെന്ന് മുന്പ് ബോംബെ ഹൈക്കോടതിയും നിരീക്ഷിച്ചിട്ടുണ്ട്. തിരിച്ചറിയല് രേഖകളായി നാം ഉപയോഗിക്കുന്ന മറ്റ് കാര്ഡുകളുടെ അവസ്ഥയും വ്യത്യസ്തമല്ല. ആധാര് കാര്ഡ് വ്യക്തിത്വം തെളിയിക്കാനുള്ള ഒരു രേഖമാത്രമാണ്. ഇന്ത്യയിലെ താമസക്കാര്ക്ക് ആധാര് ലഭിക്കുമെന്നതിനാല് ഇത് പൗരത്വ രേഖയല്ലെന്ന് സുപ്രീം കോടതി വ്യക്തമാക്കിയിട്ടുണ്ട്.
വോട്ടര് പട്ടികയില് പേരുണ്ടെന്നതിന്റെ തെളിവാണ് വോട്ടര് ഐഡി. തെരഞ്ഞെടുപ്പ് കമ്മീഷന് പൗരത്വം പരിശോധിച്ച ശേഷമാണ് ഇത് നല്കുന്നതെങ്കിലും, പൗരത്വം 'സാക്ഷ്യപ്പെടുത്താന്' കമ്മീഷന് അധികാരമില്ലെന്ന് കോടതികള് നിരീക്ഷിക്കുന്നു. പാന് കാര്ഡും ഡ്രൈവിങ് ലൈസന്സും യഥാക്രമം നികുതി കാര്യങ്ങള്ക്കും വാഹനമോടിക്കാനുമുള്ള അനുമതി രേഖകള് മാത്രമാണ്. ഇവ പൗരത്വം തെളിയിക്കാന് ഉപയോഗിക്കാനാവില്ല.
പൗരത്വം എങ്ങനെ തെളിയിക്കാം?
ഇന്ത്യന് പൗരത്വം നിശ്ചയിക്കുന്നത് 1955ലെ പൗരത്വ നിയമം അനുസരിച്ചാണ്. ഒരാള് പൗരനാണോ എന്ന് തെളിയിക്കാന് ആ വ്യക്തി ഏത് രീതിയിലാണ് പൗരത്വം നേടിയത് എന്ന് നോക്കണം:
ജനനം കൊണ്ട് പൗരത്വം ലഭിച്ചവര്
ഇന്ത്യയിലെ ഭൂരിഭാഗം പൗരന്മാരും ഈ വിഭാഗത്തില് പെടുന്നു. ഇവര് ജനിച്ച കാലയളവ് അനുസരിച്ചാണ് രേഖകള് ഹാജരാക്കേണ്ടത്:
1950 ജനുവരി 26നും 1987 ജൂലൈ 1നും ഇടയില് ജനിച്ചവര്: ഇന്ത്യയില് ജനിച്ചുവെന്ന് തെളിയിക്കുന്ന രേഖകള് (ഉദാഹരണത്തിന് ജനന സര്ട്ടിഫിക്കറ്റ്) മാത്രം മതിയാകും.
1987 ജൂലൈ 1നും 2004 ഡിസംബര് 3നും ഇടയില് ജനിച്ചവര്: സ്വന്തം ജനന സര്ട്ടിഫിക്കറ്റിന് പുറമെ, മാതാപിതാക്കളില് ഒരാളെങ്കിലും ജനനസമയത്ത് ഇന്ത്യന് പൗരനായിരുന്നു എന്ന് തെളിയിക്കുന്ന രേഖകള് കൂടി ഹാജരാക്കണം.
2004 ഡിസംബര് 3ന് ശേഷം ജനിച്ചവര്: മാതാപിതാക്കള് രണ്ടുപേരും ഇന്ത്യന് പൗരന്മാരായിരിക്കണം.
2. രജിസ്ട്രേഷന് വഴിയോ സ്വാഭാവികമായോ പൗരത്വം നേടിയവര്
ഇങ്ങനെയുള്ളവര്ക്ക് സര്ക്കാര് നല്കുന്ന പൗരത്വ സര്ട്ടിഫിക്കറ്റ് നേരിട്ടുള്ള തെളിവായി ഉപയോഗിക്കാം.
ഉപയോഗിക്കാവുന്ന രേഖകളുടെ കൂട്ടം
ഇന്ത്യയില് പൗരത്വം തെളിയിക്കാന് സാര്വത്രികമായി അംഗീകരിക്കപ്പെട്ട ഒറ്റ രേഖ നിലവിലില്ല. താഴെ പറയുന്ന രേഖകളുടെ ഒരു കൂട്ടത്തെയാണ് പലപ്പോഴും ആശ്രയിക്കുന്നത്:
ജനന സര്ട്ടിഫിക്കറ്റ്.
മാതാപിതാക്കളുടെ പൗരത്വം തെളിയിക്കുന്ന സര്ട്ടിഫിക്കറ്റുകള് അല്ലെങ്കില് അവരുടെ ഇന്ത്യന് പാസ്പോര്ട്ടുകള്.
സ്കൂള് സര്ട്ടിഫിക്കറ്റുകള്
വംശാവലിയും ജനിച്ച സ്ഥലവും തെളിയിക്കുന്ന റവന്യൂ രേഖകള്.
നിത്യജീവിതത്തില് പാസ്പോര്ട്ടും വോട്ടര് ഐഡിയും പൗരത്വത്തിന് ആധികാരിക തെളിവുകളായി പരിഗണിക്കപ്പെടുന്നുണ്ടെങ്കിലും, നിയമപരമായ തര്ക്കം വന്നാല് 1955-ലെ പൗരത്വ നിയമപ്രകാരമുള്ള രേഖകള് ഹാജരാക്കേണ്ടി വരും. പൗരത്വം എന്നത് ഒരു ഭൗതിക രേഖയല്ല, മറിച്ച് നിയമപരമായ ഒരു പദവിയാണെന്നതാണ് യാഥാര്ഥ്യം.
ദേശീയതയും പൗരത്വവും
ദേശീയതയും (Nationality) പൗരത്വവും (Citizenship) രണ്ട് വ്യത്യസ്ത നിയമങ്ങളാലാണ് ഇന്ത്യയില് നിയന്ത്രിക്കപ്പെടുന്നത്. പാസ്പോര്ട്ട് ഉള്പ്പെടെ ദേശീയത തെളിയിക്കുന്ന രേഖകള് 1967ലെ പാസ്പോര്ട്ട് നിയമത്തിന് കീഴിലാണ് വരുന്നത്. എന്നാല് ഒരു വ്യക്തിയുടെ പൗരത്വം നിശ്ചയിക്കുന്നത് 1955ലെ പൗരത്വ നിയമം അനുസരിച്ചാണ്. ദേശീയത പ്രധാനമായും അന്താരാഷ്ട്ര തലത്തിലുള്ള തിരിച്ചറിയലിനും വിദേശയാത്രകള്ക്കും വേണ്ടിയുള്ളതാണ്. വിദേശ രാജ്യങ്ങളില് പോകുമ്പോള് തങ്ങള് ആരാണെന്ന് തെളിയിക്കാനും ആ രാജ്യങ്ങളില് സുരക്ഷ ഉറപ്പാക്കാനുമാണ് ദേശീയത തെളിയിക്കുന്ന രേഖയായ പാസ്പോര്ട്ട് ഉപയോഗിക്കുന്നത്. പൗരത്വമെന്നത് ഒരു രാജ്യത്തിനകത്ത് വ്യക്തിക്കുള്ള നിയമപരമായ പദവിയെയും അവകാശങ്ങളെയും സൂചിപ്പിക്കുന്നു. ഉദാഹരണത്തിന്, വോട്ടവകാശം, സര്ക്കാര് ക്ഷേമപദ്ധതികള് എന്നിവ ലഭിക്കുന്നത് ദേശീയത കൊണ്ടല്ല, മറിച്ച് പൗരത്വത്തിലൂടെയാണ്.
ദേശീയത തെളിയിക്കുന്ന ഒരു രേഖ പൗരത്വത്തിന്റെ അന്തിമ തെളിവായി കണക്കാക്കാനാവില്ല. സാധാരണ ജീവിതത്തില് പാസ്പോര്ട്ട് എന്നത് ദേശീയതയുടെ ഏറ്റവും വ്യക്തമായ തെളിവായി കരുതപ്പെടുന്നുണ്ടെങ്കിലും, പൗരത്വം സംബന്ധിച്ച നിയമതര്ക്കം ഉണ്ടായാല് അത് അന്തിമ തെളിവായി കോടതികള് അംഗീകരിക്കില്ല. കാരണം, 1967-ലെ പാസ്പോര്ട്ട് നിയമത്തിലെ 20-ാം വകുപ്പ് പ്രകാരം, പൊതുതാല്പ്പര്യം മുന്നിര്ത്തി ഇന്ത്യന് പൗരനല്ലാത്ത ഒരാള്ക്കും പാസ്പോര്ട്ട് നല്കാന് കേന്ദ്ര സര്ക്കാരിന് അധികാരമുണ്ട്. പാസ്പോര്ട്ട് എപ്പോഴും ഇന്ത്യന് സര്ക്കാരിന്റെ സ്വത്താണ്. സര്ക്കാരിന് എപ്പോള് വേണമെങ്കിലും റദ്ദാക്കാനോ കണ്ടുകെട്ടാനോ ഉടമയോട് തിരികെ ആവശ്യപ്പെടാനോ അധികാരമുണ്ട്. എന്നാല് പൗരത്വം ഒരു നിയമപരമായ പദവിയാണ്. ഒരു വ്യക്തി സ്വന്തം ഇഷ്ടപ്രകാരം ഉപേക്ഷിക്കുകയോ അല്ലെങ്കില് നിയമപരമായ സാഹചര്യങ്ങള് ഉണ്ടാവുകയോ ചെയ്യാതെ പാസ്പോര്ട്ട് റദ്ദാക്കുന്നത് പോലെ എളുപ്പത്തില് പൗരത്വം ഇല്ലാതാക്കാന് സര്ക്കാരിന് സാധിക്കില്ല.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates