ഷിംല: താന്‍ ബീഫ് കഴിക്കാറില്ലെന്നും ഹിന്ദുവായതില്‍ അഭിമാനിക്കുന്നുവെന്നും നടിയും മാണ്ഡി ലോക്‌സഭാ മണ്ഡലത്തിലെ ബിജെപി സ്ഥാനാര്‍ഥിയുമായ കങ്കണ റണാവത്ത്.

താന്‍ ബീഫോ മറ്റേതെങ്കിലും തരത്തിലുള്ള അത്തരം ഇറച്ചികളും കഴിക്കാറില്ല, തന്നെക്കുറിച്ച് അത്തരം അടിസ്ഥാനരഹിതമായ കിംവദന്തികള്‍ പ്രചരിക്കുന്നത് ലജ്ജാകരമാണെന്നും കങ്കണ പറഞ്ഞു. ദശാബ്ദങ്ങളായി താന്‍ യോഗ, ആയുര്‍വേദ ജീവിതരീതികള്‍ പിന്തുടരുകയും അതിനെ പ്രോത്സാഹിപ്പിക്കുകയമാണ് ചെയ്യുന്നത്. തന്നെ ആളുകള്‍ക്ക് അറിയാം. തന്നെ കളങ്കിതയാക്കുകയെന്ന ഉദ്ദേശ്യത്തോടെയാണ് അത്തരം വ്യാജവാര്‍ത്തകള്‍ പ്രചരിപ്പിക്കുന്നത്. ഹിന്ദുവായി ജനിച്ചതില്‍ അഭിമാനിക്കുന്നയാളാണ് താനെന്നും കങ്കണ എക്‌സില്‍ കുറിച്ചു

നേരത്തെ താന്‍ ബീഫ് കഴിക്കുമെന്നും അത് ഇഷ്ടമാണെന്നും മാംസം കഴിക്കുന്നത് ഒരു മതവുമായി ബന്ധപ്പെട്ടല്ലെന്നും കങ്കണ എക്‌സില്‍ കുറിച്ചിരുന്നു. ആ പോസ്റ്റ് കഴിഞ്ഞ ദിവസങ്ങളിലായി കോണ്‍ഗ്രസ് നേതാക്കള്‍ പ്രചരിപ്പിക്കുകയും ചെയ്തിരുന്നു. അതിനുപിന്നാലെയാണ് കങ്കണയുടെ വിശദീകരണം.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

അടുത്തിടെ രാഷ്ട്രീയത്തില്‍ പ്രവേശിച്ച കങ്കണ റണാവത്ത് ഹിമാചല്‍ പ്രദേശിലെ മാണ്ഡി ലോക്സഭാ മണ്ഡലത്തില്‍ നിന്നുള്ള ബിജെപി സ്ഥാനാര്‍ത്ഥിയാണ്. ചലച്ചിത്രമേഖലയിലെ തന്റെ യാത്ര സുഗമമായിരുന്നില്ലെന്നും ഹിമാചലില്‍ നിന്നുള്ള ആളായതിനാലും ഇംഗ്ലീഷ് നന്നായി സംസാരിക്കാത്തതിനാലും മോശമായ അനുഭവം ഉണ്ടായി. അതേസമയം മാണ്ഡിയില്‍ നിന്നുള്ളവളാണെന്നതില്‍ അഭിമാനം തോന്നാറുണ്ടെന്നും താരം പറഞ്ഞു.