ന്യൂഡല്‍ഹി: യുഎസ് കസ്റ്റംസ് ചട്ടങ്ങളില്‍ വന്ന മാറ്റങ്ങളുടെ പശ്ചാത്തലത്തില്‍ അമേരിക്കയിലേക്കുള്ള മുഴുവന്‍ തപാല്‍ സേവനങ്ങളും നിര്‍ത്തിവെക്കാന്‍ ഇന്ത്യ. ഓഗസ്റ്റ് 25-ാം തീയതി മുതലാണ് താല്‍ക്കാലിക നിയന്ത്രണം പ്രഖ്യാപിച്ചിരിക്കുന്നത്. ഓഗസ്റ്റ് അവസാനം മുതലാണ് യുഎസ് കസ്റ്റംസ് ചട്ടങ്ങളില്‍ മാറ്റങ്ങള്‍ നിലവില്‍ വരുന്നത്.

'യുഎസ്എയിലേക്കുള്ള എല്ലാ അന്താരാഷ്ട്ര തപാല്‍ വസ്തുക്കളും, അവയുടെ മൂല്യം പരിഗണിക്കാതെ, രാജ്യത്തിനനുസരിച്ചുള്ള താരിഫ് ചട്ടക്കൂട് അനുസരിച്ച് കസ്റ്റംസ് തീരുവയ്ക്ക് വിധേയമായിരിക്കും' എന്നും തപാല്‍ വകുപ്പ് പത്രക്കുറിപ്പില്‍ പറഞ്ഞു. കത്തുകള്‍, രേഖകള്‍, 100 യുഎസ് ഡോളര്‍വരെ വിലമതിക്കുന്ന സമ്മാനങ്ങള്‍ എന്നിവയ്ക്ക് മാത്രമാകും തല്‍ക്കാലത്തേക്ക് ഇളവുണ്ടാകുകയെന്നും വകുപ്പ് വ്യക്തമാക്കിയിട്ടുണ്ട്.

ഇന്ത്യയ്ക്ക് മേല്‍ യുഎസ് പ്രസിഡന്റ് ഡൊണാള്‍ഡ് ട്രംപ് ചുമത്തിയ ഇറക്കുമതി തീരുവയാണ് നടപടിക്ക് പിന്നില്‍. ഇന്ത്യയ്ക്ക് മേല്‍ 25 ശതമാനം താരിഫ് ആയിരുന്നു ട്രംപ് ചുമത്തിയത്. ഇതിന് പിന്നാലെ റഷ്യന്‍ എണ്ണ വാങ്ങുന്നതിന് 25 ശതമാനം പിഴയും ചുമത്തിയതോടെ താരിഫ് 50 ശതമാനം ആയി ഉയര്‍ന്നിരുന്നു. ഈ പശ്ചാത്തലത്തിലാണ് സേവനങ്ങള്‍ തല്‍ക്കാലത്തേക്ക് നിര്‍ത്തിവെക്കുന്നത്.