മുംബൈ: മഹാരാഷ്ട്രയില്‍ സഹോദരിയുടെ മുന്‍ കാമുകനെ 27കാരന്‍ കൊലപ്പെടുത്തി. സഹോദരിയെയും അമ്മയെയും നിരന്തരം ശല്യപ്പെടുത്തിയതാണ് പ്രകോപനത്തിന് കാരണം. തുടര്‍ന്ന് അയല്‍വാസികളോട് കൊലപാതകത്തെ കുറിച്ച് വീമ്പിളക്കിയ യുവാവ് പൊലീസ് വലയിലായി.

താനെയിലാണ് സംഭവം. കല്ല് കൊണ്ട് മങ്കേഷ് കേദാര്‍ എന്ന യുവാവിനെ ഇടിച്ചു കൊന്ന ദീപക്കാണ് അറസ്റ്റിലായത്. ഡിസംബര്‍ 31നാണ് സംഭവം നടന്നത്. മങ്കേഷ് ഇയാളുടെ മറ്റൊരു വീട്ടില്‍ ഉറങ്ങാന്‍ പോകുമ്പോഴാണ് കൊലപാതകം നടന്നത്.  വീട്ടില്‍ മടങ്ങിയെത്താതിരുന്നതിനെ തുടര്‍ന്ന് കുടുംബാംഗങ്ങള്‍ തെരച്ചില്‍ നടത്തുന്നതിനിടെയാണ് യുവാവിനെ മരിച്ചനിലയില്‍ കണ്ടെത്തിയത്. തുടര്‍ന്ന് നടത്തിയ അന്വേഷണത്തിലാണ് 27കാരന്‍ വലയിലായത്.

കൊലപാതകത്തിന് ശേഷം അയല്‍വാസികളോട് കാര്യം വെളിപ്പെടുത്തിയ യുവാവ് പിടിയിലാകുകയായിരുന്നു. പിടിയിലാകുമെന്ന് മനസിലാക്കിയ 27കാരന്‍ രക്ഷപ്പെടാന്‍ തുടങ്ങുന്നതിനിടെയാണ് പൊലീസിന്റെ വലയിലായത്. സഹോദരിയും കേദാറും വര്‍ഷങ്ങള്‍ക്ക് മുന്‍പ് വരെ അടുത്ത ബന്ധം പുലര്‍ത്തിയിരുന്നതായി 27കാരന്‍ മൊഴി നല്‍കി. തുടര്‍ന്ന് സഹോദരിയെയും അമ്മയെയും നിരന്തരം ശല്യം ചെയ്തതാണ് പ്രകോപനത്തിന് കാരണമെന്ന് പൊലീസ് പറഞ്ഞു.