ലക്‌നൗ: ഉത്തര്‍പ്രദേശില്‍ ഹനുമാന്‍ ക്ഷേത്രത്തിന് സമീപം മണ്‍കൂനയില്‍ ആറു പെരുമ്പാമ്പുകളെ കണ്ടെത്തി. ആറു പെരുമ്പാമ്പുകളെ ഒരുമിച്ച് കണ്ടതിനെ തുടര്‍ന്ന് പരിഭ്രാന്തരായ നാട്ടുകാര്‍ പ്രദേശത്ത് തടിച്ചുകൂടി. സംഭവം അറിഞ്ഞ് അടുത്ത ഗ്രാമത്തില്‍ നിന്ന് വരെ ആളുകള്‍ പ്രദേശത്തേയ്ക്ക് ഒഴുകിയെത്തി.

മഥുരയില്‍ റായ്പൂര്‍ ഗ്രാമത്തിലാണ് സംഭവം. ആറു പെരുമ്പാമ്പുകളെ ഒരുമിച്ച് കണ്ട നാട്ടുകാരില്‍ ചിലര്‍ അതിന്റെ വായ്മൂടി കെട്ടാന്‍ ആരംഭിച്ചു. മറ്റു ചിലര്‍ക്ക് ദൃശ്യങ്ങള്‍ എടുക്കാനായിരുന്നു ധൃതി. ചില വീഡിയോകള്‍ വ്യാപകമായാണ് സോഷ്യല്‍മീഡിയയില്‍ പ്രചരിക്കുന്നത്.

വിവരം അറിഞ്ഞ് സ്ഥലത്തെത്തിയ വനംവകുപ്പ് ഉദ്യോഗസ്ഥര്‍ പാമ്പുകളെ പിടികൂടി കാട്ടില്‍ വിട്ടയച്ചു. പാമ്പുകള്‍ എവിടെ നിന്ന് വന്നു എന്നറിയാതെ നാട്ടുകാര്‍ പരിഭ്രാന്തിയിലാണെന്നാണ് റിപ്പോര്‍ട്ടുകള്‍. ഗ്രാമത്തിലെ സ്ത്രീകള്‍ പവിത്രമായി കണ്ട് പാമ്പുകള്‍ കിടന്നിരുന്ന സ്ഥലത്തെ മണ്ണ് ശേഖരിക്കാന്‍ തുടങ്ങി. മറ്റു അത്യാഹിതങ്ങള്‍ ഒന്നും സംഭവിക്കാതിരുന്നതിന് നാട്ടുകാര്‍ ദൈവത്തോട് നന്ദി പറഞ്ഞതായാണ് റിപ്പോര്‍ട്ടുകള്‍.