ന്യൂഡല്ഹി: പൊതുമേഖല ബാങ്കുകളെ പൂര്ണമായി സ്വകാര്യവത്കരിക്കാന് കേന്ദ്രസര്ക്കാര് നീക്കം. ഇതുമായി ബന്ധപ്പെട്ട് പാര്ലമെന്റിന്റെ വരുന്ന മണ്സൂണ് സമ്മേളനത്തില് ബില് അവതരിപ്പിക്കാന് കേന്ദ്രസര്ക്കാര് ആലോചിക്കുന്നതായാണ് റിപ്പോര്ട്ട്.
1970ലെ ബാങ്കിങ് നിയമം അനുസരിച്ച് പൊതുമേഖല ബാങ്കുകളില് കേന്ദ്രസര്ക്കാരിന് കുറഞ്ഞത് 51 ശതമാനമെങ്കിലും ഓഹരിപങ്കാളിത്തം വേണം. ഇതില് ഭേദഗതി വരുത്താനാണ് ഒരുങ്ങുന്നത്. നേരത്തെ ആദ്യഘട്ടത്തില് സര്ക്കാരിന്റെ ഓഹരി പങ്കാളിത്തം 26 ശതമാനമായി കുറച്ച് സ്വകാര്യവത്കരണത്തെ പ്രോത്സാഹിപ്പിക്കാനാണ് സര്ക്കാര് ആലോചിച്ചത്. പിന്നീട് ഘട്ടം ഘട്ടമായി ഓഹരികള് വിറ്റഴിച്ച് പൂര്ണമായി ബാങ്കുകളെ സ്വകാര്യവത്കരിക്കാം എന്നതാണ് പദ്ധതി.
എന്നാല് ഒറ്റയടിക്ക് സമ്പൂര്ണ സ്വകാര്യവത്കരണം നടത്തുന്നത് ഉള്പ്പെടെ നിയമത്തില് ആവശ്യമായ ഭേദഗതികള് വരുത്തുന്നതിനെ കുറിച്ചാണ് കേന്ദ്ര സര്ക്കാര് ഇപ്പോള് ആലോചിക്കുന്നതെന്നാണ് റിപ്പോര്ട്ടുകള്.നിക്ഷേപകരുടെ താത്പര്യം കണക്കിലെടുത്താണ് സമ്പൂര്ണ സ്വകാര്യവത്കരണത്തിലേക്ക് സര്ക്കാര് നീങ്ങുന്നത്. പൊതുമേഖല ബാങ്കുകളെ പൂര്ണമായി സ്വകാര്യവത്കരിച്ചാല് നിക്ഷേപകരുടെ താത്പര്യം വര്ധിക്കുമെന്നാണ് റിപ്പോര്ട്ടുകള് വ്യക്തമാക്കുന്നത്.
ഇതുമായി ബന്ധപ്പെട്ട് കേന്ദ്രസര്ക്കാര് റിസര്വ് ബാങ്കുമായി ചര്ച്ച നടത്തിവരികയാണ്. പാര്ലമെന്റിന്റെ മണ്സൂണ് സമ്മേളനം എന്നുമുതല് എന്ന് ഇതുവരെ പ്രഖ്യാപിച്ചിട്ടില്ല. കഴിഞ്ഞ ശൈത്യകാല സമ്മേളനത്തില് ബാങ്കിങ് നിയമ ഭേദഗതി ബില് ലിസ്റ്റ് ചെയ്തിരുന്നു. എന്നാല് പാര്ലമെന്റിന്റെ പരിഗണനയ്ക്ക് വന്നില്ല.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്ടസ്ആപ്പിലും ലഭ്യമാണ്. ഏറ്റവും പുതിയ വാര്ത്തകള് അറിയാന് ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates