ചെന്നൈ: ഓഡിയോ ക്ലിപ്പ് വിവാദത്തിന് പിന്നാലെ മന്ത്രി പിടിആര്‍ പളനിവേല്‍ ത്യാഗരാജനെ ധനകാര്യവകുപ്പില്‍ നിന്നും മാറ്റി തമിഴ്‌നാട് മന്ത്രിസഭയില്‍ അഴിച്ചുപണി. വ്യവസായ മന്ത്രിയായിരുന്ന തങ്കം തെന്നരശനാണ് പുതിയ ധനമന്ത്രി. 

പളനിവേല്‍ ത്യാഗരാജന് ഐടി, ഡിജിറ്റല്‍ വകുപ്പുകളുടെ ചുമതല നല്‍കി. നിലവില്‍ ഐടി മന്ത്രിയായിരുന്ന മനോ തങ്കരാജിന് ക്ഷീരവകുപ്പിന്റെ ചുമതല നല്‍കി. 

പുതുതായി മന്ത്രിസഭയില്‍ ഇടംലഭിച്ച മന്നാര്‍ഗുഡിയില്‍ നിന്നുള്ള എംഎല്‍എ ടിബിആര്‍ രാജ വ്യവസായ മന്ത്രിയാകും. മുതിര്‍ന്ന നേതാവും എംപിയുമായ ടി ആര്‍ ബാലുവിന്റെ മകനാണ് രാജ. 

ക്ഷീരവികസനവകുപ്പ് മന്ത്രിയായിരുന്ന എസ് എം നാസറിനെഒഴിവാക്കിയാണ് രാജയെ  മന്ത്രിസഭയില്‍ ഉള്‍പ്പെടുത്തിയത്. വിവരവിനിമയ വകുപ്പ് മന്ത്രി എംപി സാമിനാഥന് തമിഴ് വികസന- സാംസ്‌കാരിക വകുപ്പുകളുടെ ചുമതല കൂടി നല്‍കിയിട്ടുണ്ട്. 

മുഖ്യമന്ത്രിയുടെയും കുടുംബത്തിന്റെയും സമ്പാദ്യത്തെക്കുറിച്ചുള്ള ശബ്ദസന്ദേശത്തിലൂടെയാണ് പളനിവേല്‍ ത്യാഗരാജന്‍ വിവാദത്തില്‍ ഇടംപിടിച്ചത്. മുഖ്യമന്ത്രി സ്റ്റാലിന്റെ മകനും മരുമകനും കൂടി കോടികളുടെ വെട്ടിപ്പ് നടത്തുന്നുവെന്ന് ത്യാഗരാജന്‍ പറയുന്നതായ ഓഡിയോ ക്ലിപ്പ് ബിജെപി സംസ്ഥാന അധ്യക്ഷന്‍ അണ്ണാമലൈയാണ് പുറത്തുവിട്ടത്. 

ഈ വാര്‍ത്ത കൂടി വായിക്കൂ 

'ഗവര്‍ണര്‍ക്കു പിഴവു പറ്റി; വിശ്വാസവോട്ട് ചട്ട വിരുദ്ധം; മഹാരാഷ്ട്രാ കൂറുമാറ്റക്കേസില്‍ സുപ്രീം കോടതി

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ