ഭോപ്പാല്‍:ഹിന്ദു ദൈവങ്ങളെ അപമാനിച്ചതില്‍ രാഹുല്‍ ഗാന്ധി മാപ്പു പറയണമെന്ന് ബിജെപി എംഎല്‍എ രാമേശ്വര്‍ ശര്‍മ. മാപ്പ് പറഞ്ഞില്ലെങ്കില്‍ രാഹുലിന് എതിരെ കേസു കൊടുക്കുമെന്നും ഭോപ്പാലില്‍ നിന്നുള്ള എംഎല്‍എയായ രാമേശ്വര്‍ ശര്‍മ പറഞ്ഞു. രാഹുല്‍ ഗാന്ധിക്കും കുടുംബത്തിനും എതിരെ കടുത്ത വര്‍ഗീയ പരാമര്‍ശങ്ങളും ബിജെപി എംഎല്‍എ നടത്തി. 

' രാഹുല്‍ ഗാന്ധിയില്‍ ഹിന്ദു രക്തമില്ല. രാഹുലിന്റെ അമ്മയും സഹോദരി ഭര്‍ത്താവും ക്രിസ്ത്യാനികളാണ്. ഹിന്ദു ദൈവങ്ങളെ അധിക്ഷേപിക്കുന്നത് നിര്‍ത്തണം.'- ശര്‍മ പറഞ്ഞു. 

'രാഹുലും അദ്ദേഹത്തിന്റെ മുന്‍തലമുറക്കാരും ഹിന്ദുക്കളല്ല. ഞങ്ങള്‍ ഹിന്ദു എന്ന് അറിയപ്പെടുന്നതില്‍ ലജ്ജിക്കുന്നില്ല. നെഹ്‌റുവിന്റെ കീഴിലാണ് രാജ്യം രണ്ടായി വിഭജിക്കപ്പെട്ടത്. ആയിരക്കണക്കിന് ഹിന്ദുക്കള്‍ കൊല്ലപ്പെട്ടു. ആര്‍എസ്എസ് രൂപംകൊണ്ടതില്‍ ദൈവത്തോട് നന്ദി പറയുന്നു'- ശര്‍മ കൂട്ടിച്ചേര്‍ത്തു.