ഡെറാഢൂണ്‍: ഭാര്യയെ കൊലപ്പെടുത്തിയ ശേഷം സ്വയം വെടിയുതിര്‍ത്ത് റിട്ടയേര്‍ഡ് സൈനിക ഉദ്യോഗസ്ഥന്‍ ആത്മഹത്യ ചെയ്തു. ഉത്തരാഖണ്ഡിലെ ഡെറാഢൂണിലെ റാണി പോഖാരി പൊലീസ് സ്റ്റേഷന്‍ പരിധിയിലാണ് കേസിനാസ്പദമായ സംഭവം. ലൈസന്‍സുള്ള തോക്കുപയോഗിച്ചാണ് കൊലനടത്തിയത്. സംഭവത്തില്‍ പൊലീസ് അന്വേഷണം ആരംഭിച്ചു. 

വിരമിച്ച സൈനിക ഉദ്യോഗസ്ഥനായ അന്‍പത്തിയെട്ടുകാരന്‍ വിര്‍ജി കൃഷാലിയും ഭാര്യ കുസും കൃഷാലിയുമാണ് മരിച്ചത്. ഇരുവരും തമ്മില്‍ വഴക്കിട്ടിരുന്നില്ലെന്നും പൊലീസ് പറഞ്ഞു. രാവിലെ ഒന്‍പത് മണിക്ക് ശേഷം ഗ്രാമത്തിലെ സെക്യൂരിറ്റി ജീവനക്കാരനാണ് ഒരാള്‍ ഭാര്യയെ കൊലപ്പെടുത്തിയ ശേഷം സ്വയം വെടിയുതിര്‍ത്ത് ആത്മഹത്യ ചെയ്ത കാര്യം സ്റ്റേഷനില്‍ അറിയിച്ചതെന്നും പൊലീസ് പറഞ്ഞു. 

തുടര്‍ന്ന് സ്ഥലത്തെത്തിയ പൊലിസ് മൃതദേഹങ്ങള്‍ കണ്ടെത്തി. സംഭവസമയത്ത് വീട്ടില്‍ മരുമകള്‍ ഉണ്ടായിരുന്നതായും പൊലീസ് പറഞ്ഞു. എന്നാല്‍ അവരെ ചോദ്യം ചെയ്തപ്പോള്‍ സംഭവത്തെ കുറിച്ച് അറിയില്ലെന്നാണ് പറഞ്ഞതെന്ന് പൊലീസ് പറഞ്ഞു. രണ്ട് മൃതദേഹങ്ങളും പോസ്റ്റ് മോര്‍ട്ടത്തിന് അയച്ചതായും പൊലീസ് കൂട്ടിച്ചേര്‍ത്തു.